Urubyiruko rwo mu Karere ka Bugesera rwahuriye mu nteko Rusange y'Inama y'Igihugu y'Urubyiruko igamije kurebera hamwe ibyo rwagezeho mu mwaka wa 2024-2025 n'ibyo rwifuza kugeraho. "Urubyiruko Turashima", rusabwa kurushaho gukorana n'abafatanyabikorwa batandukanye bakorera mu Mirenge igize Akarere ka Bugesera.

Ni inteko rusange yitabiriwe n’Umuyobozi w’Akarere ka Bugesera, Mutabazi Richard, Umuhuzabikorwa w’Inama y’Igihugu y’Urubyiruko ku rwego rw’igihugu, Nyamaswa Francis, Inzego z’umutekano n’urubyiruko, kuri uyu wa Kane tariki ya 05 Kamena 2025.

Pascal Mbonimpaye, Umuhuzabikorwa w’Inama y’Igihugu mu Karere ka Bugesera, yagaragaje ibikorwa urubyiruko rwakoze muri uyu mwaka w’imihigo 2024-2025 birimo kubakira inzu n’ubwiherero imiryango itishoboye, gusubiza abana ku mashuri.

Yashimiye Ubuyobozi bw'Akarere ka Bugesera n'abafatanyabikorwa, uruhare bagira mu gushyigikira gahunda z'Ibikorwa by'imihigo y'urubyiruko. Yijeje kandi ko Urubyiruko rwa Bugesera ruzakomeza kongera ibikorwa rukora.

Ati: “Turashimira abafatanyabikorwa badufasha mu bikorwa binyuranye, imihigo ndetse no gushakira akazi urubyiruko rutandukanye. Turashimira kandi ubuyobozi bwacu uruhare bugira mu gushyigikira gahunda zose z’ibikorwa by’urubyiruko, kandi turabizeza ko tuzakomeza kongera ibikorwa dukorera abaturage no kwiteza imbere ubwacu.”

Nyinawimfura Jacqueline, waje uhagarariye MOTA ENGIL, mu Nteko Rusange y’Inama y’Igihugu y’urubyiruko rwa mu Karere ka Bugesera, yashimye ibikorwa urubyiruko rwakoze muri uyu mwaka, abizeza ko MOTA ENGIL nk'umufatanyqbikorwa bazakomeza kubaba hafi mu kubahuza n'amahirwe y'akazi no kubatera inkunga mu Mihigo y'urubyiruko.

Umunyamabanga w'Inama Njyanama y'Akarere, Bicamumpaka Ildephonse, yashimiye abafatanyabikorwa b'urubyiruko mu gutanga inama no kubafasha kugera ku ntego n'nzozi urubyiruko ruba rufite, asaba urubyiruko kandi kugira inovasiyo no kujyana n'ikoranabuhanga ry'ibikorwa biri mu Bugesera.

Yagize ati: “Bugesera ni satellite city, ni Akarere gasa n’Umujyi wa Kigali. Ese urubyiruko twiteguye kujyanamo? Biradusaba kugira inovasiyo mu bikorwa binyuranye, kugira uruhare mu gutunganya imijyi y’aho dukorera ndetse no kujyana n’ikoranabuhanga ry’ibikorwa bigenerwa akarere kacu.”

Muri iyi nteko rusange y'urubyiruko, Umuhuzabikorwa w'Inama y'Igihugu y'urubyiruko ku rwego rw'igihugu, Nyamaswa Francis, yashimiye urubyiruko rwa Bugesera ku bikorwa rukora arusaba gushyira imbagara mu bukangurambaga bugamije kwirinda ibyaha n'ingeso mbi zirimo; ibiyobyabwenge, ubusinzi n'ibindi.

Umuyobozi w'Akarere ka Bugesera, Mutabazi, yasabye urubyiruko kurushaho gukorana n'abafatanyabikorwa batandukanye bakorera mu Mirenge igize Akarere ka Bugesera. Yabasabye kandi gutegura ibikorwa biri mu mihigo y'urubyiruko hakiri kare kugira ngo bizatange umusaruro uruseho kandi mwiza.

“Iterambere ry’igihugu rishingira ku rubyiruko rwiyemeje kwishakamo ibisubizo. Urubyiruko rugomba gukorana n’ubuyobozi n’abafatanyabikorwa mu rwego rwo gutegura ejo hazaza harwo.”

Muri uyu mwaka w’imihigo wa 2024-2025, urubyiruko rw’Akarere ka Bugesera rwubakiye inzu imiryango mu mirenge itandukanye zirimo n’izo rwashyikirije imiryango ibiri yo mu murenge wa Ntarama mu kagari ka Cyugaro zifite agaciro k’amafaranga y’U Rwanda asaga miliyoni zisaga 40.

Mu karere ka Bugesera, habururwa urubyiruko rusaga ibihumbi 140 nk'uko ibarura rusange ry’ingo n’imibereho rya 2022 riheruka ribigaragaza.

Umuyobozi w'Akarere ka Bugesera, Mutabazi Richard, yasabye urubyiruko gutinyuka no guharanira guhanga udushya.

Umuhuzabikorwa w'Inama y'igihugu y'Urubyiruko, Mbonimpaye Pascal yashimiye abafatanyabikorwa mu bikorwa by'urubyiruko.

Abafatanyabikorwa bashimiwe uruhare rwabo mu guteza imbere ibikorwa by'urubyiruko rw'Akarere ka Bugesera