Mu Murenge wa Rweru, mu Karere ka Bugesera, habereye ibirori byo kwizihiza Umunsi Mpuzamahanga w’Urubyiruko ufite insanganyamatsiko igira iti: “Kubaka ubushobozi bw’urubyiruko hagamijwe iterambere rirambye”, urubyiruko rwizeza ubuyobozi bw'Akarere ka Bugesera kuba imbaraga z'iterambere rirambye.

Ni ibirori byabaye kuri uyu wa gatatu, tariki ya 13 Kanama 2025, byitabiriwe n’Umuyobozi w’Akarere ka Bugesera, Mutabazi Richard, ari kumwe n’Umuhuzabikorwa w’Inama y’Igihugu y’Urubyiruko mu Karere ka Bugesera, Mbonimpaye Pascal, inzego z’umutekano n’urubyiruko rwo mu Murenge wa Rweru.

Mu ijambo rye, Mutabazi Richard yagize ati: “Igihugu cyashyizeho amahirwe menshi agamije gufasha urubyiruko kwiteza imbere. Ni inshingano zanyu kuyabyaza umusaruro, mukirinda ibibangiriza ubuzima n’ahazaza hanyu, birimo ibiyobyabwenge, ubunebwe, ubusinzi n’ubusambanyi.”

Umuhuzabikorwa w’Inama y’Igihugu y’Urubyiruko mu Karere ka Bugesera, Mbonimpaye Pascal, yashimangiye ko urubyiruko rugomba kugira uruhare rufatika mu iterambere ry’Igihugu. 

Yagize ati: “Urubyiruko rufite ijambo rikomeye mu kubaka igihugu cyacu. Dukwiye kurangwa n’indangagaciro nziza no gukora dufatanyije n’izindi nzego kugira ngo tugere ku iterambere rirambye.”

Ibirori byaranzwe n’ibiganiro bigamije gukangurira urubyiruko kugira icyerekezo cyiza, gukunda umurimo no kugira uruhare mu bibakorerwa n’igihugu.