Umunyamabanga wa Leta muri Minisiteri ya Siporo, Rwego Ngarambe, Guverineri w’Intara y’Iburasirazuba, Pudence Rubingisa, n’Umuyobozi w’Akarere ka Bugesera bitabiriye isiganwa rya “20Km de Bugesera” ryabaye kuri iki Cyumweru, tariki ya 29 Kamena 2025.

Abayobozi batandukanye bitabiriye irushanwa ry’uyu mwaka ryabaga ku nshuro ya karindwi basiganwe mu cyiciro cy’ibilometero bitanu aho abakinnyi bose bahagurukiye ndetse bagasoreza kuri Stade ya Bugesera.

Mu bagabo bakinnye intera y’ibilometero 20, Muhitira Félicien w’Ikipe ya Nyamasheke yegukanye umwanya wa mbere akoresheje isaha imwe n’iminota ine, akurikirwa na Nsabimana Jean Claude wabaye uwa kabiri na Nizeyimana Sylvain wabaye uwa gatatu.

Mu bagore, Niyonkuru Florence usanzwe ukinira Ikipe ya Sina Gérard AC ni we wabaye uwa mbere, akurikirwa na Musabyeyezu Adeline wabaye uwa kabiri, naho Imanizabayo Emelyne aba uwa gatatu.

Mu gisiganwa ku magare, mu bakobwa basiganwe ibilometero 30, Mugisha Ariane yabaye uwa mbere akoresheje isaha n’iminota itandatu, akurikirwa na Uwimbabazi Liliane, naho Maniranzi Rose aba uwa gatatu.

Mu bagabo, Manirumva Erisa yabaye uwa mbere akoresheje iminota 52, Mucyowera Regis aba uwa kabiri naho Musonera Jean Claude aba uwa gatatu.

Mu bafite ubumuga nabo basiganwe bakoresheje amagare ya Wheelchair, mu bakobwa hakinnye umukobwa umwe ari we Imaniragena Yvonne wakoresheje iminota 21 ku ntera y’ibilometero bine, naho mu bagabo Hakizimana Emmanuel yabaye uwa mbere akoresheje iminota 17 n’amasegonda 14, akurikirwa na Ndayishimiye Ernest.

Umunyamabanga wa Leta muri Minisiteri ya Siporo Ngarambe Rwego, yavuze ko Minisiteri ishimira cyane Akarere ka Bugesera kubera iki gikorwa, asaba n’abandi kureberaho.

Ati “Ni gahunda twifuza ko n’ibindi bice by’igihugu byigiraho, hari benshi babikora mu mikino itandukanye, rero kugira ngo dukomeze tugire siporo umuco kandi tunabe icyo gicumbi cya siporo n’abandi bose bafatireho, babyigireho bibabere urugero.”

Umuyobozi w’Akarere ka Bugesera, Mutabazi Richard, yavuze ko iri siganwa baritegura mu buryo bwo kwiyubaka.

Ati “Isiganwa dutegura mu rwego rwo kwiyubaka, ni isiganwa dutegura mu gihe tuba dusoza iminsi 100 yo Kwibuka ariko tuninjira mu Kwibohora. Uyu munsi ni ku nshuro ya karindwi, twizera ko ku nshuro ya munani bizarushaho kugenda neza.”

“20Km de Bugesera” ni irushanwa riba rigizwe no gusiganwa ibilometero 20 ku maguru ku bakuru bafite hejuru y’imyaka 20, hakabamo n’ibindi byiciro birimo gusiganwa ku magare ya matabaro ibilometero 40, n’abafite ubumuga bakora ibilometero bine, iry’abakiri bato basiganwa ibilometero umunani n’iry’abishimisha rikorwa ku ntera y’ibilometero bitanu.