Umuyobozi w’Akarere wungirije ushinzwe Imibereho myiza y’Abaturage, Imanishimwe Yvette, yifatanyije n’abaturage b’Umurenge wa Kamabuye mu gutangiza ubukangurambaga bwo kwimakaza ihame ry’uburinganire, asaba abaturage kwita ku mibanire y’abashakanye hagamijwe gukemura ibibazo by’amakimbirane yo mu ngo no kugira umuryango utekanye kandi uteye imbere.

Ni ubukangurambaga bwatangijwe mu Karere ka Bugesera, kuri uyu wa Kabiri tariki ya 25 Gashyantare 2025 buzageza tariki ya 08 Werurwe 2025, bufite insanganyamatsiko igira iti: “Ihame ry’Uburinganire, Inkingi y’Imiyoborere myiza n’Iterambere ridaheza kandi rirambye.”

Atangiza Icyumweru cyahariwe kwimakaza ihame ry’uburinganire, Umuyobozi w’Akarere Wungirije Ushinzwe Imibereho myiza y’Abaturage, Imanishimwe Yvette yasabye buri wese kwita ku mibanire y'abashakanye, hagamijwe gukemura ibibazo by'amakimbirane hakiri kare, bagakangurira imiryango gusezerana byemewe n'amategeko.

Umukozi wa MAJ, Bwana Gakunzi Joshua yasobanuriye abaturage bitabiriye inteko yatangirijwemo ubukangurambaga bwahariwe kwimakaza ihame ry’uburinganire itegeko rigenga abantu n’umuryango. Yasabye abaturage kumenya uburenganzira bwabo n’ubw’umuryango mu kwimakaza uburinganire.

Umuyobozi w’Akarere wungirije ushinzwe imibereho myiza y’abaturage, Imanishimwe Yvette yavuze kandi ko buri muntu wese akwiye kugira uruhare mu kwimakaza ihame ry’uburinganire n’ubwizuzanye nk’ishingiro ry’umuryango mwiza utekanye kandi uteye imbere.

Yagize ati: “Iyi gahunda yo kwimakaza ihame ry'uburinganire n'ubwuzuzanye, iratureba twese. Tugira intero igira iti: ‘Tujyanemo, tugeraneyo kandi tugumaneyo. Twite ku bikorwa byose biteza imbere uburinganire n'ubwuzuzanye ariko n'imibereho y'abana bacu.”

Muri iki cyumweru cy’ubukangurambaga bwo kwimakaza ihame ry’uburinganire hazatangwa ibiganiro bitandukanye bigamije kurushaho gusobanurira abaturage uburinganire n’ubwuzuzanye hagati y’abashakanye. Hazandikwa kandi abana mu bitabo by’irangamimerere, kwandukuza abitabye Imana ndetse no gusezeranya mu mategeko imiryango ibana mu buryo butemewe n’amategeko.

Umuyobozi w'Akarere wungirije ushinzwe imibereho myiza y'abaturage, Imanishimwe Yvette yasabye abaturage kwitabira ibikorwa biteganijwe mu bukangurambaga bwo kwikamaaza ihame ry'uburinganire n'ubwuzuzanye