Kuri uyu wa 8 Werurwe 2025, Hon. Senateri Mukabalisa Donatille n’Itsinda ry’Abadepite bagize Ihuriro ry’abanyarwandakazi baba mu nteko ishingamategeko y’u Rwanda, yifatanyije n’abaturage b’Akarere ka Bugesera kwizihiza Umunsi Mpuzamahanga w’umugore, wizihirijwe mu Murenge wa Gashora, asaba abaturage kwirinda amakimbirane yo mu muryango kuko adindiza iterambere ryawo ndetse n’Igihugu muri rusange.

Ni ibirori byitabiriwe n’Umunyamabanga nshingwabikorwa w’Intara y’Ibirasirazuba, Dr. Nyirahabimana Jeanne, Ubuyobozi bw’akarere ka Bugesera, abagize Inama y’Igihugu y’Abagore ku rwego rw’Intara y’Ibirasirazuba n’Akarere ka Bugesera, inzego z’umutekano n’abafatanyabikorwa b’Akarere mu bikorwa byo guteza imbere umuryango.

Mu butumwe yahaye abitabiriye ibirori byo kwizihiza umunsi mpuzamahanga w’umugore, Hon. Senateri Mukabalisa Donatille, yashimye intambwe imaze guterwa mu guteza imbere umugore mu Rwanda, asaba buri wese kwirinda amakimbirane yo mu ngo no mu muryango kuko bidindiza iterambere ryawo n'igihugu.

Yagize ati: “Nubwo hari ibyo tumaze kugeraho dukwiye gusigasira no kongera, haracyari ibibazo bikibangamiye umuryango; birimo amakimbirane mu muryango. Ayo makimbirane agira ingaruka nyinshi cyane; ateza ubukene mu muryango akanagira ingaruka ku bana b’uwo muryango kuko aribo tubona bagwingiye, abana b’abakobwa baterwa inda imburagihe.”

Umuhuzabikorwa w'Inama y'Igihugu y'Abagore mu Karere ka Bugesera, Mutumwinka Imerde, yavuze ko uyu munsi ufasha buri wese kongera kwishimira agaciro umugore yasubijwe n'imiyoborere myiza y'Igihugu, irangajwe imbere na Nyakubahwa Perezida wa Repubulika, Paul Kagame.

Ati: ”Uyu munsi nka ba Mutima w’Urugo udufasha kongera kwishimira agaciro twasubijwe n’imiyoborere myiza y’Igihugu cyacu irangajwe imbere na Nyakubahwa Perezida wa Repubulika Paul Kagame, Imana imukomereze amaboko. Udufasha kandi kwisuzuma, tugasesengura ibibazo bicyugarije umuryango tukanafata ingamba zigamije kuzamura imibereho myiza n’iterambere ry’umuryango ukize kandi utekanye.”

Umunyamabanga Nshingwabikorwa w’Intara y’Iburasirazuba, Dr. Nyirahabimana Jeanne, yasabye buri wese kuganira ku ihame ry'uburimganire n'ubwuzuzanye kugira ngo ryumvikane neza bityo bifashe umuryango kubaho neza.

Ati: ”Mu Ntara y’Iburasirazuba kandi ubu twatangiye ubukangurambaga bwo kwimakaza ihame ry’uburinganire. Aha ni ukugira ngo mu ntara yose aho duhurira tujye tuganira kuri iri hame ry’uburinganire n’ubwuzuzanye ryumvikane neza kugira ngo twese tubeho turyumva kandi ridufashe kubana neza mu mahoro. Kugira ngo kandi tugire umuryango ushoboye kandi utekanye, urwego rw’Umudugudu hakwiye kujya imbaraga.”

Muri uyu mwaka, Inama y’Igihugu y’Abagore ifatanyije n’inzego n’Abafatanyabikorwa batandukanye yakoze ibikorwa bitandukanye bigamije guteza imbere umugore n’umuryango birimo; kuremera imiryango y’abagore itandukanye yahawe inka indi ihabwa amatungo magufi, ibikoresho byo mu nzu n’ibiryamirwa. Abagore 72 kandi bahawe amafaranga agera kuri 7,200,000 mu rwego rwo kubongerera ubushobozi mu mishanga yabo ibyara inyungu basanzwe bakora. Imiryango 155 yaremewe amashyiga ya canarumwe mu rwego rwo kurengera ibidukikije no kongera umwanya Umugore akoresha mu bindi bikorwa biteza Umuryango imbere, abagore 63 bahagarariye abandi mu tugali  nabo bahawe telephone zigezweho hagamijwe guteza imbere ikoranabuhanga n’itumanaho ku bagore.

Hon. Senateri Mukabalisa Donatille, yasabye buri wese kwirinda amakimbirane yo mu ngo no mu muryango kuko bidindiza iterambere ryawo n'igihugu.

Umunyamabanga Nshingwabikorwa w’Intara y’Iburasirazuba, Dr. Nyirahabimana Jeanne, yasabye buri wese kuganira ku ihame ry'uburimganire n'ubwuzuzanye kugira ngo ryumvikane neza bityo bifashe umuryango kubaho neza.

Umuhuzabikorwa w'Inama y'Igihugu y'Abagore mu Karere ka Bugesera, Mutumwinka Imerde yavuze ko uyu munsi ufasha buri wese kongera kwishimira agaciro umugore yasubijwe n'imiyoborere myiza y'Igihugu.

Imiryango y’abagore itandukanye yahawe ibikoresho bitandukanye ndetse n'amafaranga mu rwego rwo kubongerera ubushobozi mu mishanga yabo ibyara inyungu basanzwe bakora.