Mu marushanwa ry’Umurenge Kagame Cup mu mukino w’umupira w’amaguru wakomeje ku rwego rw’Intara, Umurenge wa Ruhuha mu cyiciro cy’abagabo wakomeje muri 1/2 cy’irangiza nyuma yo gutsinda Umurenge wa Murambi wo mu Karere ka Gatsibo ibitego 2-0.

Ni umukino wabaye kuri uyu wa mbere, tariki ya 02 Werurwe 2026 ubera kuri stade y’Akarere ka Bugesera witabirwa n’abayobozi batandukanye ku rwego rw’akare n’imirenge.

Uyu mukino waranzwe n’ishyaka ryinshi ku mpande zombi, aho abakinnyi bagaragaje ubushake bwo gutsinda no guhagararira neza imirenge yabo.

Mu cyiciro cy’abagore, Umurenge wa Rweru wakatishije itike ya 1/2 cy’irangiza usezereye Umurenge wa Gitoki yo muri Gatsibo kuri penaliti 4-2, nyuma y’uko amakipe yombi yari yanganyije 1-1 mu mukino usanzwe.

Mu butumwa Umuyobozi w’Akarere ka Bugesera, Mutabazi Richard, yahaye abitabiriye imikino ya Umurenge Kagame Cup, yibukije ko iri rushanwa rigamije guteza imbere umuco wo guhiga no kurushanwa mu baturage.

Yanagaragaje ko iri rushanwa ari umwanya mwiza wo gutangiramo ubutumwa bugamije kwimakaza imiyoborere myiza n’ubufatanye mu baturage.

Yasabye abakinnyi, abayobozi n’abafana kurangwa n’imyitwarire myiza, kubahana no gukina mu mwuka w’ubusabane, kugira ngo siporo ikomeze kuba umusemburo w’ubumwe n’iterambere mu baturage.

Irushanwa rya Umurenge Kagame Cup rikomeje gukinwa mu gihugu hose rigamije guteza imbere siporo mu baturage, gushimangira ubumwe n’ubufatanye, ndetse no gutanga ubutumwa bufasha abaturage kwitabira gahunda z’iterambere ry’igihugu.