Mu rwego rwo guteza imbere urubyiruko no kurufasha kwiteza imbere mu buryo burambye, mu Mujyi wa Nyamata hari kubakwa Ikigo cy’Urubyiruko kizwi nka Imbuto Hub. Iki kigo kizajya gitanga serivisi zitandukanye zirimo imyidagaduro, amahugurwa, siporo, ikoranabuhanga, ubuhanzi n’ubugeni, kikazaba ari urubuga rw’ingirakamaro ku rubyiruko rwo mu mirenge ya Nyamata, Musenyi, Ntarama, Rilima n’ahandi.

Mu kwitegura imikorere y’iki kigo, hateranye inama nyunguranabitekerezo yahuje Ubuyobozi bw’Akarere ka Bugesera, Imbuto Foundation, abahagarariye urubyiruko, inzego z’uburezi, abikorera, amadini n’amatorero, Inama Njyanama y’Akarere ndetse n’inzego z’umutekano. 

Iyi nama yayobowe n’Umuyobozi w’Akarere ka Bugesera, Mutaabazi Richard ari kumwe n’umuyobozi wa Imbuto Foundation, Shami Elodie yibanze ku kurebera hamwe uko urubyiruko rwazabyaza umusaruro amahirwe ruzahabwa binyuze muri iki kigo cya Nyamata Imbuto Hub.

Mu ijambo rye, Umuyobozi w’Akarere ka Bugesera, Mutabazi Richard yavuze ko iki kigo nk’ubuyobozi bw’Akarere bakitezeho umusaruro munini mu gufasha urubyiruko kugira ku nzozi nziza zarwo.

Yagize ati: “Iki kigo kizafasha urubyiruko guhanga udushya no kwiteza imbere mu buryo burambye, binyuze mu myidagaduro, imikino, ikoranabuhanga, siporo n’ubuhanzi.”

Umuyobozi Mukuru wa Imbuto Foundation, Shami Elodie yavuze ko uyu mushinga wo kubaka ibigo by’urubyiruko uzakorwa mu gihugu hose ari ku ikubitiro ukaba waratangiriye mu karere ka Bugesera.

Yongeyeho kandi ko ari n’uburyo bushya bwo kurushaho kwegera urubyiruko kugira ngo bafashwe kugaragaza imbano zabo no kwiyubaka

Ati: “Imbuto Hub ni ahantu urubyiruko rwigira gusangira no kugaragaza impano, kandi tuzafatanya kugira ngo iki kigo gifashe urubyiruko kurushaho kwiyubaka.”

Nyuma y’inama, abayitabiriye basuye ahari kubakwa iki kigo, basobanurirwa aho imirimo igeze n’ibiteganyijwe. Biteganyijwe ko Imbuto Hub izatangira gutanga serivisi mu mpera z’umwaka wa 2025.

Iki gikorwa ni intambwe ikomeye mu guteza imbere urubyiruko rw’Akarere ka Bugesera, no kurufasha kugira uruhare rugaragara mu iterambere ry’igihugu.

Nyuma y'Inama nyunguranabitekerezo, abayobozi basuye ahari ibikorwa byo kubaka Ikigo cy'Urubyiruko-Imbuto Hub cya Nyamata, basobanurirwa uko imirimo yacyo ihagaze kuri ubu.

Umuyobozi w'Akarere ka Bugesera, Mutabazi Richard n'Umuyobozi Mukuru wa Imbuto Foundation Shami Elodie basuye ibice bitandukanye by'Ikigo cy'Urubyiruko kiri kubakwa mu Mujyi wa Nyamata.

Iki kigo kizaba kigizwe n'ibice bitandukanye birimo n'ikibuga cya Basketball kizaba kirimo imbere.

Urwinjiriro rw'Ikigo cy'Urubyiruko-Imbuto Hub