Ku Kimenyetso cy'Urwibutso rwa Jenoside, ku rufunzo rwa Cyugaro hazwi nka CND mu Murenge wa Ntarama, habereye igikorwa cyo Kwibuka ku nshuro ya 31 Jenoside yakorewe Abatutsi, by'umwihariko abana n'abagore biciwe muri urwo rufunzo ruhuza imirenge ya Ntarama, Musenyi na Mugina yo mu Karere Kamonyi mu Ntara y’Amajeypfo.

Iki gikorwa cyabaye kuri uyu wa gatatu, tariki ya 30 Mata 2025, cyitabiriwe na Guverineri w’Intara y’Iburasirazuba, Pudence Rubingisa; Ubuyobozi bw'Akarere, Inama Njyanama y'Akarere, Ibuka, Inzego z'Umutekano, abahagarariye Amadini n'Amatorero, inshuti n'imiryango y'abafite ababo biciwe muri uru rufunzo, abaharokokeye, n'abaturage ba Ntarama.

Umuyobozi w’Akarere ka Bugesera, Mutabazi Richard, muri iki gikorwa cyo kwibuka, yagarutse ku mwihariko w’abiciwe muri uru rufunzo ngo kuko batashoboye kuboneka ngo bashyingurwe mu cyubahiro.

Yagize ati: “Aha twibukiye, hafite umwihariko kuko imibiri myinshi y’abahaguye yarengewe n’isayo, ntiyavanywemo ngo ishyingurwe mu cyubahiro.”

Niweburiza Aime Claire warokokeye mu rufunzo rwa Cyugaro, mu gikorwa cyo Kwibuka ku nshuro ya 31 Jenoside yakorewe Abatutsi mu 1994, yavuze ubuhamya bw'amateka yanyuzemo muri Jenoside, asobanura uko we n'abandi bahigwaga n'ibitero by'interahamwe bahungiye mu rufunzo bakarokorwa n'Inkotanyi.

Guverineri w’Intara y’Iburasirazuba, Pudence Rubingisa, wifatanyije n'abatuye Akarere ka Bugesera Kwibuka ku nshuro ya 31 Jenoside yakorewe Abatutsi, biciwe ku rufunzo rwa Cyugaro, yihanganishije imiryango yarokokeye mu rufunzo rwa Cyugaro anashimira Ingabo zari iza RPF Inkotanyi uruhare zagize, ubutwari n'imbaraga mu kubohora u Rwanda no guhagarika Jenoside yakorewe Abatutsi.

Ati: "Turashimira Ingabo zari iza RPF Inkotanyi zagize ubutwari n'imbaraga byo kubohora u Rwanda no guhagarika Jenoside yakorerewe Abatutsi.”

Urufunzo rwa Cyugaro ruhuza imirenge ya Ntarama, Musenyi yo mu Karere ka Bugesera n’Umurenge wa Mugina wo mu Karere ka Kamonyi mu Ntara y’Amajyepfo.

Uru rufunzo, muri Jenoside yakorewe abatutsi 1994, hiciwemo abatutsi benshi bitewe nuko hazanywe Interahamwe ziturutse mu kigo cya gisirikare cya Gako, Ngenda na Gashora, abavuye muri Komine Bicumbi, Gikomero, Mbogo, Nyamabuye n’ibindi bice bya Gitarama, Mugina n’ahandi, baje ari benshi muri bisi za ONATRACOM, bashinga imbunda ku musozi barasa impande zose z’uru rufunzo, Interahamwe nyinshi zarugose, uwinyeganyeje bakabona aho ari bakamwica.

Guverineri w'Intara y'Iburasirazuba, Pudence Rubingisa, yifatanyije n'abaturage b'akarere ka Bugesera, inshuti n'imiryango y'abafite ababo biciwe mu rufunzo rwa Cyugaro, abaharokokeye, n'abaturage ba Ntarama, Kwibuka ku nshuro ya 31 Jenoside yakorewe Abatutsi.

Umuyobozi w’Akarere ka Bugesera, Mutabazi Richard, muri iki gikorwa cyo kwibuka yagarutse ku mwihariko w’abiciwe muri uru rufunzo rwa Cyugaro ko batashoboye kuboneka ngo bashyingurwe mu cyubahiro.

Ni igikorwa cyitabiriwe n'Ubuyobozi bw'Akarere, Inama Njyanama y'Akarere, Ibuka, Inzego z'Umutekano, abahagarariye Amadini n'Amatorero n'abandi.

Depite Uwubutatu Marie Therese, Guverineri Rubingisa Pudence, Umuyobozi w'Akarere ka Bugesera, Mutabazi Richard n'uwa Kayonza, Nyemazi Bosco bitabiriye igikorwa cyo Kwibuka ku nshuro ya 31 Jenoside yakorewe abatutsi biciwe mu rufunzo rwa Cyugaro-Ntarama

Igikorwa cyo Kwibuka Abatutsi biciwe mu rufunzo rwa Cyugaro cyashojwe no gushyira indabo ku rufunzo rwa Cyugaro ndetse no ku bunamira.