Kuri uyu wa Kane tariki ya 07 Kanama 2025, Umunyamabanga Nshingwabikorwa w’Akarere ka Bugesera, Joseph Nkuranga, yakiriye itsinda rya Minisiteri y’Imari n’Igenamigambi n’umuryango CLADO riyobowe na Mbabazi Diane ryasuye akarere ka Bugesera mu rwego rwo gusobanurira Abanyamabanga Nshingwabikorwa b’Imirenge iibikorwa n’imishinga ikubiye mu Ngengo y’Imari y’Igihugu y’umwaka wa 2025-2026.

Umunyamabanga Nshingwabikorwa w’Akarere ka Bugesera, Joseph Nkuranga, yasabye abanyamabanga nshingwabikorwa b’Imirenge gushishikariza abaturage kugana ubuyobozi bw’Imirenge yabo kugira ngo bamenye neza imishinga ibagenewe, bityo babashe kuyikurikirana no kugira uruhare mu ishyirwa mu bikorwa ryayo.

Guverinoma y’u Rwanda igaragaza ko amafaranga ateganyijwe gukoreshwa mu ngengo y’Imari ya 2025-2026 ari miliyari 7.032,5 Frw, aziyongeraho miliyari 1.216,1Frw ugereranyije na miliyari 5.816,4 Frw yo mu ngengo y’imari ivuguruye ya 2024/25.

Amafaranga akomoka imbere mu gihugu azagera kuri miliya 4.105,2 Frw, inkunga z’amahanga ziteganyijwe kugeza kuri miliyari 585,2 Frw, na ho inguzanyo z’amahanga zikazagera kuri miliyari 2.151,9 Frw.

Nyuma y’ibiganiro, Abanyamabanga Nshingwabikorwa b’Imirenge bashyikirijwe udutabo tw’amakuru tugamije gufasha abaturage kumenya no gusobanukirwa ibikorwa n’imishinga iteganyijwe muri uyu mwaka w’ingengo y’imari.