Ku bufatanye bw’Akarere, Ibuka, inzego z’umutekano n’abaturage bifatanyije n’abarokotse Jenoside Yakorewe Abatutsi, bagize Umuryango Urumuri-Maranyundo, mu gikorwa cyo Kwibuka ku nshuro ya 31 Jenoside Yakorewe Abatutsi by’umwihariko hibukwa abiciwe ku musozi wa Maranyundo Murenge wa Nyamata.

Ni igikorwa cyabaye kuri iki cyumweru tariki ya 18 Gicurasi 2025, cyitabiriwe n’Umuyobozi w'Imirimo rusange mu Karere, Niyongabo Jacques.

Mu kiganiro kigaruka ku mateka yaranze Jenoside Yakorewe Abatutsi, Amb. Joseph Mutaboba yagarutse ku ruhare rw’ Ububiligi mu guhembera urwango n’amacakubiri yagejeje u Rwanda kuri Jenoside yakorewe Abatutsi. Yasabye abaturage kwirinda icyasenya ubumwe bw’Abanyarwanda.

Umuyobozi w'Imirimo rusange mu Karere, Niyongabo Jacques, mu butumwa yagejeje ku bitabiriye igikorwa cyo Kwibuka ku nshuro ya 31, Jenoside yakorewe Abatutsi ku musozi wa Maranyundo, yavuze ko kwibuka ari uguhamya ukuri kw'amateka y'Igihugu no kunyomoza abahakana bakanapfobya Jenoside yakorewe Abatutsi.

“Kwibuka Jenoside yakorewe Abatutsi ni uguhamya ukuri. Ni uguhakana n’ijwi riranguruye ko Jenoside yabaye itateguwe mu kajagari, ko itari intambara y’amoko, ahubwo yari umugambi mubisha wo kurimbura abatutsi. Ni ukwigisha abana bacu amateka atari aya Jenoside gusa, ahubwo n’aya kwiyubaka, kwiyunga, no kubaka u Rwanda rushya rutarangwa n’ivangura.”

Perezida wa Ibuka mu Karere ka Bugesera, Bankundiye Chantal, yasabye urubyiruko kwirinda guheranwa n'amateka mabi u Rwanda rwanyuzemo mu gihe cya Jenoside yakorewe Abatutsi. Yabasabye kandi gutanga umusanzu mu kubaka Igihugu kizira Jenoside no kwirinda ibinyoma.

“Rubyiruko bana bacu, turabasaba kudaheranwa n’amateka mabi ya Jenoside yakorewe Abatutsi. Ayo mateka inkotanyi zarayagaritse, mudufashe kumva kandi mwoguheranwa n’impfunwe ryayo. Turabasaba rero kugaragaza umusanzu wanyu mu bikorwa byubaka igihugu ndetse no kurushaho kwirinda ibinyoma bikwirakwizwa n’abatifuriza ineza igihugu cyacu.”

Umuyobozi w'Umuryango Urumuri-Maranyundo, Sebadende Emmanuel, yashimiye abifatanije n'uyu muryango mu gikorwa cyo Kwibuka ku nshuro ya 31 Jenoside yakorewe Abatutsi, by'umwihariko abiciwe ku musozi wa Maranyundo. Yasabye ubufatanye mu gusigasira amateka ya Jenoside Yakorewe Abatutsi.

Umusozi wa Maranyundo ni hamwe mu hantu hafite amateka ya Jenoside yakorewe Abatutsi mu Karere ka Bugesera, aho mu gihe cya Jenoside yakorewe Abatutsi hiciwe Abatutsi benshi yaba abari bahatuye ndetse n’abandi bari bahahungiye bahizeye amakiriro, ariko interahamwe zikabagabaho ibitero zirabica.