Mu bibazo by’inzitane Intore Kinyakura yemeza ko ubufatanye, ubupfura, ubunyangamugayo kudacika intege n’izindi ndangagaciro z’umunyarwanda watojwe zireba buri wese ufite aho ahuriye n’uburezi bw’umwana. Uhereye ku mubyeyi ukagera ku mufatanyabikorwa utera inkunga uburezi bose bahurira ku njishi bagafatanya kuzamura igisenge aribwo burere bw’umwana. Kinyakura Jean de Dieu Intore yasobanuye gusigasira igisabo kikaguma ku nkingi hifashishijwe imikorongiro yemeza ko imikorongiro yafashije mwarimu kwisobanukirwa. Umukorongiro w’injishi, inkingi n’igisabo ibatoza kwikura mu bibazo by’inzitane abarimu bahura nabyo. Mu mvugo ya gitore bakoresheje inkingi, igisenge n’injishi maze bishakira inzira aho kuganya ko ari mwarimu w’ibibazo byaburiwe inzira yo kubikemura. Abarimu bagaragaje indangagaciro mu itorero ry’abarimu kuri site ya Ririma. Intore zari zigizwe n’abayobozi mu burezi, barimo abagabo n’abagore babarezi basanzwe harimo na none abarezi bihaye Imana bo mu matorero anyuranye; padiri, pasteri n’abandi. Nk’uko Rwasa Patric wari uhagarariye itorero kuri site ya Ririma yabitangaje ku munsi wo gusoza itorero kuri uyu wa 12/1/2017. Hari abarezi kuri site ya Ririma bagaragaje indangagaciro zinyuranye. Abo barashimiwe. Umutoza Rwasa yashimiye ku mugaragaro imbere y’abarezi n’imbere y’ Intumwa ya rubanda wari umushyitsi mukuru mu gikorwa cyo gusoza itorero mu Karere ka Bugesera Honorable Nyirahirwa Veneranda. Ndatabaye Ezechiel yaranze amafaranga ibihumbi mirongo 4 yatoraguye asubizwa uwayataye, Bamwigire Gloriose wakomeretse yihanganiye gukomeza ingando kugeza zishoje, Niwemukiza Thamari we yaritanze akora umurimo wo gususurutsa abari mu itorero igihe kingana n’icyumweru bamaze bakora itorero. Bukeho Anyango Sylviya umunyamahanga ukora umwuga w’uburezi mu Rwanda wari witabiriye itorero ry’abarimu yagaragaje ubushake bwo kwiga indangagaciro nyarwanda ndetse ashyira no mu bikorwa ibyo yize. Mukantare Jacqueline