Kuri uyu wa Mbere, tariki ya 13 Mutarama 2025, mu Karere ka Bugesera kimwe n’ahandi mu Gihugu, hatangijwe Urugerero rw’Inkomezabigwi icyiciro cya 12 ku banyeshuri basoje amashuri yisumbuye 2023-2024. 

Igikorwa cyo gutangiza ku mugaragaro Urugerero, cyabereye mu Murenge wa Juru, cyitabiriwe n’Umuyobozi w’Akarere ka Bugesera Mutabazi Richard ari kumwe n’intumwa ya  Minisiteri y’Ubumwe bw’Abanyarwanda n’Uburere Mboneragihugu, inzego z’umutekano n’abaturage muri rusange.

Atangiza ku mugaragaro Urugerero Inkomezabigwi 12, Umuyobozi w’Akarere ka Bugesera, Mutabazi Richard yashimiye Intore zitabiriye, avuga ko zitumwe ku rugerero gufatanya n’inzego z'ubuyobozi mu bikorwa bihindura imibereho y'abaturage, kurangwa n'udushya, kwitabira ku gihe, no kurangwa n'indangagaciro z'ubutore.

Yagize ati: “Nitutabatoza bazayoba usange tugiye kubagarura twatinze kubera ko ibyonnyi n’abagizi ba nabi bo ntibabura, abatoba ntibabura n’abayobya ntibabura. Biradusaba kutabifata nk’ibizikora ahubwo twumve ko ari inshingano zacu; kurera no gutoza abana umurongo mwiza.”

Harerimana James, ni umwe mu ntore zatangiye urugerero avuga ko ibikorwa by’urugerero batangiye gukora biri mu rwego rwo gufatanya n’ubuyobozi mu gukemura ibibazo bibangamiye imibereho myiza y’abaturage.

Ati: “Twishimiye ko natwe nk’urubyiruko tugiye kugira uruhare rufatika mu gufasha abaturage batishoboye kuva mu bukene. Mu bikorwa rero tugiye gukora mu kwezi kurengaho iminsi; tuzubaka ubwiherero, tunubakire abatishoboye ndetse tunimakaze isuku.”

Intumwa ya MINUBUMWE, Bwana Emmanuel yavuze ko Urugerero rwatangiye uyu munsi ruje gufasha  gutanga umusanzu mu byiciro binyuranye cyane mu mibereho myiza y'abaturage. Yavuze kandi ko Intore zizahiga izindi zizashimirwa mu rwego rw’Igihugu.

Mu Karere ka Bugesera, Intore zisaga 2000 nizo zatangiye ibikorwa by’urugerero, rufite insanganyamatsiko igira iti: “Duhamye umuco w’ubutore ku rugerero.”