Ku gicamunsi cyo kuri uyu wa Kabiri, mu Tugari tugize Akarere hari kubera Inteko z’Abaturage zirikuganira ku ngingo zirimo umutekano, isuku n'isukura, kwitegura igihembwe cy'ihinga 2026A no gukemura ibibazo by'abaturage.  Umuyobozi w'Akarere Wungirije Ushinzwe Iterambere ry'Ubukungu, Umwali Angelique, yifatanyije n'abatuye Akagari ka Maranyundo mu Murenge wa Nyamata.

Umuyobozi w’Akarere wungirije ushinzwe imibereho myiza y’abaturage, Yvette Imanishimwe, yifatanyije n’abaturage ba Kagasa mu Kagari ka Ramiro mu Murenge wa Gashora.

Visi Meya Umwali Angelique, yibukije abaturage kwita ku myubakire itavogera ubutaka bw'ubuhinzi no kwirinda imyubakire y'akajagari aho batuye, mu rwego rwo kubahiriza imikoreshereze y'ubutaka bikwiye. Yabasabye kandi kunoza isuku.

Yabasabye kandi gutegura imirima yabo (kurima) mu rwego rwo kwitegura igihembwe cy'ihinga cya 2025-2026A no kwicungira umutekano barara irondo.

Umuyobozi w’Akarere wungirije ushinzwe imibereho myiza y’abaturage, Yvette Imanishimwe, yasabye abaturage kujyana abana muri gahunda y’intore mu biruhuko no kwitabira gahunda Nzamurabushobozi igamije gufasha abana batishoboye kubona kwiga neza no gutsinda neza amasomo azabafasha kwimuka mu wundi mwaka.

Muri izi nteko, ubuyobozi bw’Akarere bwakiriye kandi bunakemura ibibazo by'abaturage bitandukanye byabajijwe n'abitabiriye inteko, ibindi bihabwa umurongo w’uburyo byakemurwa.