Akarere ka Bugesera kari gushyira mu bikorwa umushinga wo kugeza umuriro w’amashanyarazi mu ngo z’abaturage hagamijwe kugera ku ntego za gahunda ya kabiri y’Igihugu yo kwihutisha iterambere (NST2).

Muri uyu mushinga, ingo 5,000 zizahabwa amashanyarazi mu gihe kitarenze amezi atandatu, hibandwa cyane cyane mu bice by’icyaro.

Umuyobozi w’Akarere ka Bugesera wungirije ushinzwe iterambere ry’ubukungu, Umwali Angelique, yavuze ko uyu mushinga ugamije gukemura ikibazo cy’abaturage batuye mu bice bitagerwagamo n’umuriro w’amashanyarazi, hanongerwa n’ubushobozi bw’imiyoboro mu bice byari bifite umuriro muke.

Yagize ati: “Uyu mushinga uzafasha kugeza amashanyarazi ku baturage batari bayafite, tunubake imiyoboro mishya ndetse dushyireho ‘transifo’ mu duce dutandukanye, harimo ibigo by’amashuri, ibigo nderabuzima n’ibiro by’utugari bitagerwagamo n’umuriro.”

Uyu mushinga uzashyirwa mu bikorwa mu mirenge yose igize Akarere ka Bugesera, by’umwihariko mu bice by’icyaro, unitezweho gutanga n’akazi ku baturage bawutuye hafi.

Ubushakashatsi bw’Ikigo cy’Igihugu cy’Ibarurishamibare bwo mu 2022 bugaragaza ko abafite amashanyarazi mu Karere ka Bugesera bageze kuri 60.8%. 

Biteganyijwe ko uyu mushinga uzafasha Akarere kugera ku kigero cya 100% cy’abaturage bafite amashanyarazi muri gahunda ya NST2.