Kuri uyu wa Gatatu, Umuyobozi w’Akarere Wungirije Ushinzwe Imibereho Myiza mu Karere ka Bugesera, Yvette Imanishimwe, ari kumwe n’Umuyobozi Mukuru w’Ibitaro bya Nyamata, Dr. Sebajuri Jean Marie Vianney, yayoboye inama mpuzabikorwa y’Ubuzima.

Iyi nama yari igamije gusuzuma uko ibipimo by’ubuzima bihagaze mu Karere no gufata ingamba zo kunoza imitangire ya serivisi z’ubuzima ku rwego rw’inzego zose z’ubuvuzi.

Abayitabiriye baganiriye ku buryo bwo kongera ubwitabire mu bikorwa by’isuzuma n’ubukangurambaga, kunoza imikorere y’ibigo nderabuzima no kongera imikoranire hagati y’inzego zitandukanye z’ubuzima.

Umuyobozi w’Akarere Wungirije Ushinzwe Imibereho Myiza mu Karere ka Bugesera, Yvette Imanishimwe, yashimangiye ko kugira ubuzima bwiza bw’abaturage ari inkingi ya mwamba mu iterambere ry’akarere, asaba ko buri rwego rukora ibishoboka byose kugira ngo serivisi z’ubuzima zigere ku baturage neza kandi ku gihe.

Inama yasojwe hafatwa imyanzuro igamije kongera imbaraga mu gukurikirana ibipimo by’ubuzima no kunoza imikoranire hagati y’abafatanyabikorwa bose b’urwego rw’ubuzima.