Kuri uyu wa Gatatu, Umuyobozi Wungirije w’Akarere ka Bugesera ushinzwe Imibereho myiza y’Abaturage, Madamu Imanishimwe Yvette, yakiriye itsinda rya Imbuto Foundation ryasuye Akarere mu rwego rwo gutegura imikoreshereze y’Ikigo cy’Urubyiruko cya Nyamata kiri kubakwa mu Murenge wa Nyamata.

Iri tsinda ryasuye Akarere ka Bugesera mu rwego rwo gukusanya ibitekerezo n’amakuru ku bikorwa n’amaserivisi urubyiruko rwifuza ko byazahabwa umwanya muri icyo kigo, hagamijwe guteza imbere imibereho myiza n’iterambere ry’urubyiruko.

Iki kigo cy’urubyiruko cya Nyamata nicyuzura kitezweho kuzafasha urubyiruko mu ngeri zitandukanye, zirimo: Amahugurwa y’ubumenyi ngiro no kwihangira imirimo, ubumenyi ku buzima bw’imyororokere n’uburenganzira bw’abangavu, guhuza urubyiruko n’amahirwe yo gukura mu bushobozi, gushyigikira impano mu mikino, ubuhanzi n’ikoranabuhanga n’ibindi.

Byitezwe ko iki kigo cyizuzura mu kwezi kwa Nzeri 2025 kikazaba kirimo ibikorwa bifasha urubyiruko mu ngeri zitandukanye zirimo imikino n’imyidagaduro kandi mu buryo bugezweho.