Hagamijwe kuzamura ibipimo by’umwana w’ubakitse mu gihagararo, mu bwenge no gukangura ubwonko, none tariki 24/5/2023 mu karere ka Bugesera hashojwe icyumweru cyahariwe serivisi za gahunda mbonezamikurire y’abana bato ECDs n’uruhare rw’ababyeyi mu kurandura igwingira n’imirire mibi

Guhera kuwa 15 kugera tariki 24 Gicurasi 2023 mu Karere ka Bugesera kari mu bikorwa bitandukanye bijyanye na gahunda y’ingo mbonezamikurire y’abana bato. Ibirori byo gusoza icyumweru cyahariwe ibigo mbonezamikurire y'abana bato byitabiriwe n'Umuyobozi w'Intara y’Iburasirazuba CG Gasana Emmanuel wifatanyije n'abaturage bo mu murenge wa Ngeruka n'abafatanyabikorwa bafasha Akarere kwitaho abana mu ngo mbonazamikurire y'abana ECDs.

Umuyobozi w'Intara CG Gasana ati : "Iki cyumweru kidusigiye izihe ngamba"? Asaba ubufatanye mu nshingano yo guha uburere n'umuco abana ku bufanye bw'umubyeyi, umurezi, ubuyobozi ku midugudu n'abafatanyabikorwa bafasha kuzamura imikurire no gukangura ubwonko muri ECDs

Bimwe mu bikorwa byakozwe mu cyumweru cya serivisi y’ibigo mbonezamikurire y’abana bato birimo :

kwimakaza isuku n’isukura, Gusuzuma uko abana bitabira serivisi za ECD , Kurwanya igwingira n'imirire mibi, gutanga amata, ifu y’igikoma, ibikoresho byo gukangura ubwonko bw’umwana n’ibikoresho by’isuku mu ngo mbonezamikurire.