Madamu Mukeshimana  Gerardine Minister w'ubuhinzi n'Ubworozi , inzego z'umutekano n'Umuyobozi w'Akarere ka Bugesera w'agateganyo Bwana Mugiraneza David batangije ku mugaragaro ibikorwa byo kuhira. Ni bimwe mu bisubizo by'imvura nke yo muri iki gihembwe cy’ihinga A

 Minisitiri w’Ubuhinzi n'Ubworozi Madamu Mukeshimana Gerardine mu rwego rwo gukangurira abaturage guhangana n'ingaruka z'imihindagurikire y’ikirere bafatanyije n'abahinzi ba Mareba kuhira ibigori bihinze ku buso buhuje kuri site y'ubuhinzi ya Keza ifite ubuso bungana na 70ha. Ni igokorwa cyakozwe  hifashishijwe amazi ya Cyohoha y'amajyaruguru

Bwana Mugiraneza Umuyobozi w'Akarere w'Agateganyo yasobanuriye Minister Mukeshimana Gerardine ko Akarere kahawe moteri 230 n'ibikoresho bigendanye nazo bizifashishwa kuhira site zegereye amazi kandi ko n'abahinzi bahabwa moteri kuri nkunganire hifashishijwe amazi y'ibiyaga, imigezi n'ibishanga..

Minisitiri Mukeshimana yabwiye abahinzi ko bakomeza kwitaho n’ibindi bihingwa byihanganira izuba kugirango barwanye inzara. Madamu Mukeshimana avuga ko ufite amazi atarumbya. Ati : "Umuhinzi agomba kuhira mu buryo ashoboye na Leta ikamwunganira ariko ibiryo bikaboneka". Akomeza abwira abahinzi kwishyirahamwe bakuhira bakoresheje imipira izamura amazi bahawe na Leta binyuze muri Ministeri y'ubuhinzi. Site zizakorwaho ibikorwa byo kuhira hifashijwe moteri n’ibikoresho byatanzwe na Minisiteri y’ubuhinzi bikazakoreshwa kuri site 49 zegereye amazi zihwanye na 2,131ha

Mu byifuzo  by’abahinzi bagejeje kuri  Minisitiri; abahinzi basabye Ministitiri gukomeza kubafasha kugirango bongere ubuso bwuhirwa ku isozi, aho bamubwiye ko bifuza ko babahabwa shitingi na roswari zunganira imipira izamura amazi biyageza mu bidamu bityo abatari gukoresha imipira bakazikoresha.