Mu rwego rwo guteza imbere ubuhinzi binyuze mu mushinga wo gutunganya ibishanga, kuri uyu wa Kabiri tariki ya ya 19 Kanama 2025, itsinda ry’Ikigo cy’Igihugu gishinzwe guteza imbere ubuhinzi n’ubworozi (RAB) hamwe n’abafatanyabikorwa baryo basuye Akarere ka Bugesera, bagirana ibiganiro n’abakozi bashinzwe ubuhinzi ku rwego rw’Akarere.

Ibiganiro byibanze ku ngamba zo guteza imbere ubuhinzi, by’umwihariko umushinga wo kurushaho gutunganya no gucunga neza igishanga cya Rurambi, gihingwamo umuceri, kugira ngo gifashe mu kongera umusaruro no guteza imbere imibereho myiza y’abagihingamo.

Ubuyobozi bw’Akarere ka Bugesera bwashimye ubufatanye bwa RAB n’abandi bafatanyabikorwa mu guteza imbere ubuhinzi, buhamya ko bizafasha kurushaho kuzamura iterambere ry’abaturage n’ubukungu bw’Akarere.

Igishanga cya Rurambi gihuza Imirenge ya Mwogo na Juru, gifite ubuso bugana na Hegitari 1000. Muri izi izigera kuri hegitari 750 ni zo zikorerwaho ibikorwa by'ubuhinzi.