Kuri uyu wa Gatandatu, mu Karere ka Bugesera habereye igitaramo cyo kwizihiza Intwari z’Igihugu, cyari gifite insanganyamatsiko igira iti: “Ubutwari n’Ubumwe bw’Abanyarwanda, inkingi z’iterambere.” 

Iki gitaramo cyitabiriwe n’abayobozi batandukanye, inzego z’umutekano, urubyiruko n’abaturage muri rusange.

Abitabiriye iki gitaramo cyo kwizihiza Intwari z’Igihugu basusurukijwe mu ndirimbo n’imbyino zirata ibigwi n’ubutwari bw’Intwari z’u Rwanda, n’itsinda Shalom Music Stars Band ryo mu Karere ka Bugesera. 

Atanga ikaze, Umuyobozi w’Akarere ka Bugesera, Mutabazi Richard, yashimiye abitabiriye igitaramo n’abagize uruhare mu kugitegura, by’umwihariko abahanzi, ashimangira ko kwizihiza Intwari z’Igihugu ari ingenzi mu gusigasira indangagaciro z’ubutwari n’ubumwe bw’Abanyarwanda.

Senateri Emmanuel Havugimana, mu kiganiro yatanze, yagarutse ku muco w’ubutwari wagaragajwe n’Intwari z’u Rwanda mu rugamba rwo kubohora Igihugu no guhagarika Jenoside yakorewe Abatutsi, asaba Abanyarwanda gukomeza kurangwa n’izo ndangagaciro.

Itorero Ndangamuco – Troupe Culturelle IZUBA ryanyuze abitabiriye igitaramo binyuze mu mukino witwa:“Mon pays, mon phénix”, ugaragaza amateka y’u Rwanda, urugendo rwo guhagarika Jenoside yakorewe Abatutsi n’icyerekezo cy’iterambere igihugu kigezeho.

Iki gitaramo cyabaye umwanya mwiza wo kuzirikana ubutwari bw’Intwari z’Igihugu no kongera gushimangira ubumwe n’ubudaheranwa by’Abanyarwanda.