Ku bufatanye bw’Akarere ka Bugesera, Ibuka n’Umuryango Zirikana Kayenzi, bibutse ku nshuro ya 31 Jenoside yakorewe Abatutsi barenga 450 bari batuye ku musozi wa Kayenzi mu Murenge wa Ntarama mu cyahoze ari muri Komini Kanzenze.

Ni igikorwa cyabereye mu Murenge wa Ntarama kuri uyu wa Kabiri, tariki ya 22 Mata 2025 kitabirwa n’abayobozi batandukanye, inzego z’umutekano, abaturage ndetse n’abagize Umuryango Zirikana Kayenzi ugizwe n’abarokokeye ku musozi wa Kayenzi.

Umuyobozi w’Akarere ka Bugezera, Mutabazi Richard wari fitanyije n’Umuryango Zirikana Kayenzi ndetse n’abaturage muri iki gikorwa cyo kwibuka, yavuze ko Kwibuka Abatutsi biciwe kuri uyu musozi no mu bindi bice bitandukanye, ari umwanya wo kumvira hamwe ubuhamya bw'ibyaranze Jenoside yakorewe Abatutsi bikabera buri wese isomo.

 Ati: “Kwibuka ni umwanya mwiza twongera kumvira hamwe amateka y'Igihugu cyacu. Ni umwanya twongera kumvira hamwe ubuhamya bw'ibyaranze Jenoside yakorewe Abatutsi tukabikuramo isomo n'ubumenyi bwo guharanira ko Jenoside itazongera kubaho ukundi.”

Twizeyimana Protogene ukuriye Umuryango Zirikana Kayenzi, agaruka ku ishusho y’amateka y’uko Abatutsi batujwe ku musozi wa Kayenzi n’uko ubwicanyi bwabereye kuri uyu musozi muri Jenoside yakorewe Abatutsi mu 1994. Ashimira kandi ubuyobozi bw’Akarere bwashyigikiye gahunda y’Umuryango Zirikana Kayenzi mu gikorwa ngaruka mwaka cyo kwibuka.

Ati: “Kuri uyu musozi wa Kayenzi hatujwe imiryango 108 mu gihe cya peyizana baturutse mu turere dutandukanye. Jenoside rero yabaye Kayenzi ituwe n’imiryango 139 igizwe n’abantu 756, muri Jenoside hicwa Abatutsi bangana na 435, ndetse n’imiryango ine yazimye, akaba ari nayo mpamvu dusaba ko kuri uyu musozi wa Kayenzi hashyirwa ikimenyetso cy’Urwibutso kubw’abacu bazize Jenoside.”

Twizeyimana kandi ashimira ubuyobozi bw’Akarere ka Bugesera bwabafashije gushyiraho gahunda yo kwibuka Abatutsi biciwe ku musozi wa Kayenzi.

Ati: “Turashimira ubuyobozi bw’Akarere n’ubw’igihugu muri rusange kuba tuzajya duhurira kuri uku musozi tukibuka abacu. Turashimira kandi by’umwihariko Perezida wa Repubulika n’ingabo zahoze ari iza RPA zahagaritse Jenoside, ubu tukaba dufiye umutekano.”

Umuryango Zirikana Kayenzi usanzwe ukora igikorwa ngarukamwaka cyo kwibuka Jenoside yakorewe Abatutsi, ariko kuri iyi nshuro ubuyobozi bw’Akarere bukaba bwarabongeye ku rutonde rw’imiryango Akarere kifatanya nayo mu gihe cyo Kwibuka.

Umuyobozi w’Akarere ka Bugezera, Mutabazi Richard yagaragaje ko Kwibuka Jenoside yakorewe Abatutsi ari umwanya wo kumvira hamwe ubuhamya bw'ibyaranze Jenoside yakorewe Abatutsi bikabera buri wese isomo.

Twizeyimana Protogene ukuriye Umuryango Zirikana Kayenzi, ashimira ubuyobozi bw’Igihugu n'ingabo za RPA zahagaritse Jenoside