Binyuze mu nteko z’Abaturage, mu Mirenge igize Akarere ka Bugesera, kuri uyu wa Kabiri tariki ya 05 Kanama 2025, hatangijwe ubukangurambaga bugamije gukemura ibibazo bibangamiye imibereho myiza y’abaturage, buzibanda ku ngingo zitandukanye zirimo: gushishishakariza kwitabira ubwisungane mu kwivuza (Mutuelle de Santé), kwizigamira binyuze muri gahunda ya Ejo Heza, ndetse no kwimakaza isuku n’isukura mu ngo no mu midugudu.

Ni ubukangurambaga ku rwego rw’Akarere bwatangirijwe mu Murenge wa Mayange, mu Kagari ka Gakamba ku nsanganyamatsiko igira iti: “Ubuzima Bwiza, Kwigira, Isuku Hose – Twubake Ejo Heza Hacu Uhereye None.”

Umuyobozi w’Akarere wungirije ushinzwe Iterambere ry’Ubukungu, Umwali Angelique, yavuze ko gukemura ibibazo bibangamiye imibereho y’abaturage bisaba ubufatanye hagati y’inzego z’ubuyobozi n’abaturage ubwabo. 

Umuhuzabikorwabikorwa wa EjoHeza mu Karere ka Bugesera, Umumararungu Clementine, muri umu bukangurambaga yasobanuriye abaturage ibyiza byo kwizigama muri Ejo Heza, abasaba kwitabira gutanga umusanzu wabo muri gahunda ya EjoHeza mu rwego rwo rwo kuzigamira ejo hazaza habo n’ah’imiryango yabo kugira ngo bazagire amasaziro meza.

Ubu bukangurambaga bwatangiye kuri uyu wa 05 Kanama 2025, buzasozwa tariki ya 29 Kanama 2025, bwateguwe n’intara y’Iburasirazuba mu rwego rwo gufatanya n’abaturage mu gukemura ibibazo bibangamiye imibereho myiza y’abaturage.

Ubu bukangurangambaga bugamije gushishikariza buri muturage kugira uruhare mu kwiteza imbere no guteza imbere umuryango nyarwanda.