Umuyobozi w’Akarere Wungirije Ushinzwe Iterambere ry’Ubukungu, Umwali Angelique, yifatanyije n’abaturage b’Umurenge wa Ntarama mu kagari ka Cyugaro mu gutangiza icyumweru cyahariwe kwimakaza ihame ry’uburinganire: “Ihame ry’uburinganire, inking y’imiyoborere myiza n’iterambere ridaheza kandi rirambye“.

Ni ubukangurambaga bwatangiye kuri uyu wa kabiri tariki 17 Nzeri 2024 bukazageza tariki ya 27 Nzeri 2024, bwatangirijwe mu nteko z’abaturage mu mirenge yose igize Akarere ka Bugesera, ku rwego rw’Akarere butangirizwa mu Murenge wa Ntarama, buzibanda ku kwandikisha abana mu gitabo cy’irangamimerere, gusezeranya imiryango ibana mu buryo butemewe n’amategeko no kurwanya amakimbirane agaragara mu ngo.

Umuyobozi w'Akarere Wungirije Ushinzwe Iterambere ry'Ubukungu, Umwali Angelique yavuze ko Icyumweru cyahariwe kwimakaza ihame ry'umuryango ari gahunda nziza igamije gukemura ibibazo bitandukanye byugarije umuryango, birimo amakimbirira, abana batanditse mu irangamimerere n'ibindi.

Yasabye kandi abaturage kwitabira serivisi zo kwandikisha abana mu bitabo by'irangamimerere, gusezerana imbere y'amategeko ku miryango yabanaga bitemewe n'amategeko, gufasha abana b'abakobwa babyariye iwabo gusubira ku ishuri ndetse no gufashwa kubona ubutabera; hahanwa ababahohoteye.

Mu gutangiza ku mugaragaro Icyumweru cyahariwe kwimakaza ihame ry'uburinganire, hatanzwe ibikoshu by'umwuga wo kudoda bihabwa abana b'abakobwa babyariye iwabo ndetse hanatangwa ibikoresho by'ishuri ku bana bava mu miryango itishoboye.