Mu rwego rwo gushyira mu bikorwa gahunda yo gukumira igwingira n’imirire mibi mu bana bato, Akarere ka Bugesera ku bufatanye n’Ikigo cy’Igihugu gishinzwe guteza imbere uburenganzira bw’Umwana (NCDA), hatangiye amahugurwa y’iminsi ibiri agamije kuzamura ibipimo ngenderwaho bya Serivisi Mbonezamikurire y’Abana Bato (ECDs).

Aya mahugurwa yatangijwe ku mugaragaro n’Umuyobozi w’Akarere wungirije ushinzwe imibereho myiza y’abaturage,  Yvette Imanishimwe, ari kumwe n’intumwa ya NCDA, Bwana NIYITEGEKA Alex ku wa 21 Ukwakira 2025 azasoze tariki 22 ukwakira 2025.

Amahugurwa yitabiriwe n’abakozi bashinzwe ubugenzuzi bw’uburezi mu Mirenge, abakozi b’Akarere bashinzwe gukurikirana no kwita ku Ngo Mbonezamikurire y’Abana Bato, abashinzwe kurinda no kurengera umwana, ndetse n’abafatanyabikorwa bafasha Akarere mu gukurikirana ibikorwa bya ECDs.

Atangiza aya mahugurwa, Yvette Imanishimwe yashimangiye ko gahunda ya y’Ingo Mbonezamikurire y’Abana bato ari urufunguzo mu iterambere ry’umwana n’iry’igihugu muri rusange, agaragaza uko izi serivisi zihagaze mu Karere ka Bugesera mu byiciro bitandukanye.

Yasabye abitabiriye amahugurwa gukoresha ubumenyi bazahabwa mu kunoza imikorere y’ingo mbonezamikurire, gukurikirana imikurire y’abana, no guharanira ko nta mwana wugarizwa n’imirire mibi cyangwa igwingira.

Yagize ati: “Twese dufite inshingano zo kurinda no gufasha umwana gukura neza mu buryo bwose bushoboka. Amahugurwa nk’aya adufasha kongera ubumenyi no kunoza uburyo dutanga serivisi zinoze kandi zifite ireme.”

NIYITEGEKA Alex, uhagarariye NCDA, yashimiye ubuyobozi bw’Akarere ka Bugesera ku mikoranire myiza mu bikorwa bigamije guteza imbere uburenganzira bw’umwana, ashimangira ko aya mahugurwa ari amahirwe yo kubaka ubushobozi bw’abakozi b’Akarere kugira ngo serivisi za ECDs zirusheho gutangwa ku rwego rwo hejuru.

Aya mahugurwa azamara iminsi ibiri, aho abazayitabira bazaganira ku ngingo zitandukanye zirimo ibipimo ngenderwaho bya Serivisi Mbonezamikurire y’Abana bato, uburyo bwo gupima no gukurikirana imikurire y’abana, ndetse n’uburyo bwo guhangana n’imirire mibi binyuze mu bufatanye hagati y’inzego zose bireba.