Bugesera, tariki ya 17 Nyakanga 2025 – mu cyumba cy’inama cy’Akarere ka Bugesera, habereye inama nyunguranabitekerezo ku mushinga ugamije kubaka ubushobozi bwo gukumira no guhangana n’indwara z’ibyorezo. Iyi nama yateguwe ku bufatanye na Ministeri y’Ubuzima binyuze mu Kigo cy’Igihugu gishinzwe Ubuzima (RBC).

Iyi nama yayobowe n’Umuyibozi w’Akarere Wungirije Ushinzwe Imibereho Myiza y’Abaturage, Imanishimwe Yvette, yitabirwa n’abayobozi bashinzwe ubuzima mu Karere ndetse n’abandi bafatanyabikorwa mu rwego rw’ubuzima.

Umukozi mu Kigo cy’Igihugu gishinzwe ubuzima, Uwisunzimana Francois, yavuze ko muri uyu mushinga ugamije kubaka ubushobozi bwo gukumira no guhangana n’indwara z’ibyorezo.

Ati: “Uyu mushinga uzibanda ku kubaka ubushobozi bwo gukumira no guhangana n’indwara z’ibyorezo, nko ku mipaka, ibibuga by’indege ndetse no kongerera ubushobozi ibigo nderabuzima bitandukanye.”

Yongeyeho kandi ko mu bikorwa bizaranga uyu munshinga harimo kubaka Laboratwari izajya yifashishwa mu gusuzuma indwara z’ibyorezo ndetse no gutanga ibikoresho birimo imbangukiragutabara zizifashishwa muri ibi bikorwa.

Umuyibozi w’Akarere Wungirije Ushinzwe Imibereho Myiza y’Abaturage, Yvette Imanishimwe, yavuze gukumira indwara z’ibyorezo bisaba ubufatanye bwinzego zose. 

Yagize ati: “Gukumira indwara z’ibyorezo bisaba ubufatanye bw’inzego zose. Tugomba gutegura ingamba zihamye zishingiye ku makuru yizewe, tugashyira imbere ubukangurambaga no kwigisha abaturage uko birinda. Akarere kihaye intego yo gukomeza kwimakaza ibikorwa byo kubungabunga ubuzima bw’abaturage.”

Uyu mushinga uzakoera mu turere turimo Bugesera, Nyagatare na Kirehe mu Ntara y’Iburasirazuba, Burera na Gicumbi mu Ntara y’Amajyaruguru, Rusizi na Rubavu mu Ntara y’Iburengerazuba ndetse na Nyaruguru mu Ntara y’Amajyepfo.