Mu kiganiro cyatanzwe n’ikigo gishinzwe Kugenzura Iyubahirizwa ry’Ihame ry’Uburinganire (GMO, abakozi b’Akarere ka Bugesera, basabwe kurushaho gukumira no kurwanya ihohoterwa rishingiye ku gitsina rikorerwa mu kazi kuko rigira ingaruka mbi k’uwarikore ndetse n’imitangire ya serivisi ku baturage.

Ni ikiganiro cyatanzwe n’Umuyobozi Mukuru wungirije muri GMO, Muhongerwa Agnes kigaruka ku ihohoterwa rishingiye ku gitsina rikorerwa mu kazi, kuri uyu wa Gatatu, tariki ya 10 Nzeri 2025.

Muri iki kiganiro,Umuyobozi Mukuru Wungirije wa GMO, Muhongerwa Agnes, yasobanuriye abakozi b’akarere ka Bugesera imiterere y’ihohoterwa rishingiye gutsina rikorerwa mu kazi, ingaruka rigira mu mitangire ya serivisi ndetse n’inshingano za buri wese mu kurirwanya no kuryirinda.

Muhongerwa Agnes yasabye buri wese kwirinda no kurwanya ihihoterwa rishingiye ku gitsina rikorerwa mu kazi kuko ridindiza imitangire ya Serivisi ku baturage batugana, mu bakozi by’umwihariko k’uwarikorewe.

Yagize ati: “Bimaze kugaragara ko hari abakozi usanga bakorerwa ihohoterwa rishingiye ku gitsina mu kazi kabo, ibi bigira ingaruka nyinshi haba kuri bo, mu kazi ndetse n’abakenera serivisi. Twese dufatanyirize hamwe kurwanya ihohoterwa rishingiye ku gitsina aho dukorera ndetse n’ahandi.”

 Umuyobozi w’Akarere ka Bugesera, Mutabazi Richard, yashimiye Ubuyobozi bw’ikigo gishinzwe Kugenzura Iyubahirizwa ry’Ihame ry’Uburinganire mu Rwanda ku ruhare bugira mu kugenzura iyubahirizwa ry'ihame ry'uburinganire, kubaka umuryango uhamye kandi utekanye no kurwanya ihohoterwa rishingiye ku gitsina.

Ikiganiro ku ihohoterwa rishingiye ku gitsina rikorerwa mu kazi ni kimwe mu biganiro bizahabwa abayobozi n’abakozi b’Akarere imirenge n’utugari mu cyumweru cyahariwe ubukangurambaga bwo kwimakaza ihame ry’uburinganire buri gukorwa mu turere twose tugize Intara y’Ibirasirazuba ku bufatanye bw’iyi Ntara na Minisisiteri y’Iterambere ry’Umuryango binyuze mu Kigo cy'Igihugu gishinzwe kugenzura iyubahirizwa ry'ihame ry'uburinganire.