Ku bufatanye bw’Akarere ka Bugesera n’Ikigo cy’Igihugu cyita ku mikurire y’abana bato-NCDA, hagiye gutangizwa porogaramu nshya yo kurandura burundu igwingira mu bana bato hifashishijwe imiryango ifite abana badafite ikibazo cy’igwingira, bakigisha ababyeyi bagenzi babo bafite abana barwaye imirire mibi uburyo bwo kwita ku bana babo.

Ibi byagaragajwe kuri uyu wa Kabiri tariki 29 Nyakanga 2025, ubwo NCDA yagaragazaga umushinga wa gahunda nshya yo gufasha ingo zirwaje imirire mibi kuyivamo mu rwego rwo kurwanya igwingira mu bana bato mu Karere ka Bugesera, muri gahunda yo kugira igicumbi cy’imikurire y’abana mu mudugudu.

Bikorimana Isaac ushinzwe kwita ku mirire y’abana muri NCDA, yagaragaje ko iyi gahunda yo gukoresha ba Bandebereho izafasha ababyeyi bari mu cyiciro cy’imibereho imwe n’abo bareberaho kwiyubakamo icyizere no guhindura imyumvire ku bijyanye no gutegurira abana indyo yuzuye.

Ati: “Iyi gahunda izafasha ba babyeyi bafite abana bari mu mirire mibi kubona ko bagenzi babo batayirwaje bakoresheje ubushobozi buke bafite mu kwita ku bana bashobora gutsinda imirire mibi iganisha ku igwingira. Ubu buryo rero kandi tubwitezeho umusaruro mwiza kuko muri buri mudugudu tuzaba dufitemo ababyeyi hagati ya 10 na 20 barwaje imirire bazajya bafashwa na babandi batarwaje imirire.”

Umuyobozi w’Akarere ka Bugesera wungirije ushinzwe imibereho myiza y’Abaturage, Imanishimwe Yvette yashimiye NCDA ku bufatanye bagira mu kwita ku buzima bw’abana muri rusange.

ati: “Iyi gahunda turayishima kuko izadufasha kwigisha ababyeyi kwita ku bana babo binyuze ku bandi babyeyi baturanye. Ni igikorwa tubona ko kizatanga umusaruro mwiza kuko ari gahunda izajya ikorerwa ku mudugudu. Turasaba rero buri wese kugira uruhare rwe mu guteza imbere iyi gahunda ya Bandebereho.”

Raporo iheruka yo muri 2020, igaragaza ko Akarere ka Bugesera kageze kuri 26% mu kugabanya igwingira mu bana bato, aho kandi byitezwe imibare mishya izaba igaragaza ko Akarere ka Bugesera igwingira rizaba riri munsi ya 20%.