Mu Mirenge yose igize Akarere ka Bugesera, hasojwe Urugerero rw’Intore z’Inkomezabigwi icyiciro cya 12 zisabwa gukomeza umuco w’ubutore. 

Ni igikorwa ku rwego rw’Akarere cyabereye mu Murenge wa Nyamata kuri stade y’Akarere ka Bugesera.

Umuyobozi w’Akarere ka Bugesera Mutabazi Richard, yasabye intore zishoje urugerero gukomeza kurangwa n’umuco w’ubutore, umurava ndetse no gukunda igihugu.

Yabibukije kandi gukomeza gukora ibikorwa bifasha abaturage kuzamura imibereho yabo n’iterambere ndetse no kuzitabira Itorero ry’Indangamirwa riteganywa mu gihe cyiri imbere.

Urugerero rw’inkomezabigwi icyiciro cya 12 rwatangiye tariki ya 13 Mutarama 2025, rutangirizwa mu Mirenge yose uko ari 15 igize Akarere ka Bugesera, ku rwego rw’Akarere rutangirizwa mu Murenge wa Juru, rusorezwa mu Murenge wa Nyamata tariki ya 28 Gashyantare 2025. 

Mu karere ka Bugesera, Intore 1856 zisoje Urugerero rw'Inkomezabigwi icyiciro cya 12, zakoze ibikorwa bitandukanye bifite agaciro kangana na miliyoni zisaga 38 z’amafaranga y’u Rwanda, birimo; kubakira inzu, uturima tw’igikoni imiryango itishoboye ndetse no gukora ubukangurambaga bigamije gufasha abaturage kwiteza imbere no kuzamura imibereho yabo.