Kuri uyu wa Gatandatu, tariki ya 30 Ugushyingo 2024, ku bufatanye bw’Akarere ka Bugesera n’umufatanyabikorwa Right to Play n’Amabasade y’Ubuholandi mu Rwanda, ku kibuga cy'amagare Field of Dreams kiri mu kigo Gasore Serge Foundation mu Murenge wa Ntarama, hatangijwe umushinga Power to Pedal ugamije gufasha abana bato kuzamura impano zabo binyuze mu mukino w’amagare.

Ni igikorwa cyitabiriwe n’umuyobozi w’Akarere Mutabazi Richard, umuyobozi Mukuru wa Right to Play, Amadou Cissé, Ambasaderi w’Ubuholandi mu Rwanda Joan JJ Wiegman, Umunyamabanga Mukuru wa Komite Olimpike mu Rwanda, Kajangwe Jerome ndetse n’Umukinnyi Anna van der Breggen, wegukanya Shampiyona y’Isi y’amagare muri 2016.

Mu ijambo Umuyobozi w'Akarere ka Bugesera, Mutabazi Richard, yagejeje ku bitabiriye igikorwa cyo gutangiza umushinga Power to Pedal, yashimiye abafatanyabikorwa bazanye uyu mushinga mu Karere ka Bugesera, agaragaza ko ari amahirwe azafasha abana bato kuzamura impano no kugera ku nzozi zabo binyuze mu mukino w'amagare.

“Turashimira abafatanyabikorwa bose batumye inzozi zacu zigiye kuba impamo. Uyu mushinga mwiza wo guteza imbere no kuzamura impano z’abana bato binyuze mu mukino w’amagare, ni igikorwa tubona ko kizafasha abana kugera ku nzozi zabo binyuze muri uyu mukino w’amagare”

Umuyobozi w'Akarere ka Bugesera, Mutabazi Richard, yashimiye Right to Play yazanye umushinga Power to Pedal.

Umuyobozi wa Right to Play mu Rwanda, Amadou Cissé, yasobanuye ko umushinga Power to Pedal ugamije kuzamura imibereho y'abana bato; mu biringanire no kuzamura impano binyuze mu mukino w'amagare. Yijeje ko kandi uyu mushinga uzatanga umusaruro binyuze mu bufatanye bw'inzego zitandukanye.

Yagize ati:“Uyu mushinga twawutangirije mu Karere ka Bugesera mu rwego rwo gufasha abana kwiyubaka mu bumenyi butandukanye binyuze mu mukino wo gutwara amagare. Turizera ko bizatanga umusaruro mwiza mu gihe inzego zitandukanye zirimo Akarere, ishyirahamwe ry’umukino w’amagare mu Rwanda ndetse n’abandi tuzaba dufatanya kugera ku ntego z’uyu mushinga.”

Umuyobozi Mukuru wa Right to Play mu Rwanda, Amadou Cissé, yavuze ko umushinga Power to Pedal uzatanga umusaruro binyuze mu bufatanye bw'inzego zitandukanye.

Ambasaderi w'Ubuholandi mu Rwanda, Joan JJ Wiegman,witabiriye igikorwa cyo gutangiza uyu mushinga. Yashimiye Akarere ka Bugesera ku mbaraga bakomeje kugaragaza mu guteza imbere siporo, by’umwihariko umukino w’amagare ku bana b’abakobwa. Yashimangiye kandi ko umukino w'amagare ari inzira nziza y'ubuzima.

Ati: “Umukino w’amagare ni inzira y’ubuzima kuri benshi kandi wongera umubano mu miryango. Twishimira kandi ko uyu mushinga udaheza abakobwa n’abagore kuko bizabafasha kwiyubakamo icyizere, gutekereza byagutse ndetse no kuba ab’ingirakamaro mu miryango yabo no ku Gihugu.”

Ambasaderi w'Ubuholandi mu Rwanda, Joan JJ Wiegman,yitabiriye igikorwa cyo gutangiza umushinga Power to Pedal. 

Umushinga Power to Pedal witezweho kubakira ubushobozi abana bakiri bato mu ngeri zitandukanye, zirimo kwimakaza ihame ry’uburinganire, uburezi n’ibindi binyuze mu mukino w’amagare, ku ikubitiro watangiranye n’abana 108, aho 60% bari hagati y’imyaka 11 na 20.