Akarere ka Bugesera kakiriye abakozi 28 bashya b’Urwego rwunganira Akarere mu by’Umutekano (DASSO) barangije amahugurwa ajyanye n’inshingano zabo, basabwa kurangwa n’ubunyamwuga, ubwitange n’indangagaciro z’akazi.

Ibi byabaye ku wa Gatatu tariki 07 Mutarama 2026, ubwo Umuyobozi w’Akarere ka Bugesera, Mutabazi Richard, yabakiraga akabagezaho icyerekezo cy’Akarere n’umwihariko wa Bugesera. 

Umuyobozi w'Akarere ka Bugesera, Mutabazi Richard yabasabye gukomera ku mahame agenga umwuga batojwe gukora, 

Yagize ati: “Tugiye gukorana, ni ngombwa ko mumenya umwihariko wa Bugesera, nkaba mbasaba gukora mukaguma ku mahame yanyu y’umwuga; mwirinda ikintu cyabakururira mu bintu bitari ngombwa. Rero ndabifuriza akazi keza.”

Aba DASSO bashya 28 barimo abagabo 21 n’abagore 7, bahawe imirenge bazajya bakoreramo ndetse banashyikirizwa amasezerano y’akazi.

Basoje amahugurwa yabo mu kigo cya Polisi i Gishari mu Karere ka Rwamagana, aho Minisitiri w’Ubutegetsi bw’Igihugu, Habimana Dominique, yabibukije ko umutekano ari inkingi y’imiyoborere myiza n’iterambere, ashimangira ko DASSO bafite uruhare rukomeye mu gukumira ibibangamira imibereho myiza y’abaturage.

Kugeza ubu, Akarere ka Bugesera gafite abakozi ba DASSO 117 bakorera mu mirenge 15, ku tugari tumwe na tumwe ndetse no ku kicaro cy’Akarere.