Mu rwego rwo guteza imbere imibereho myiza y’abaturage no kwimakaza umuco w’isuku n’isukura, ubuyobozi bw’Akarere ka Bugesera burashishikariza abayobozi ku nzego zose, hamwe n’abagize inzego z’ibanze, kongera imbaraga mu bikorwa bigamije kwimakaza isuku n’isukura mu bice byose by’Akarere.

Babisabwe mu nama ya komite Mpuzabokorwa y’Akarere ka Bugesera yahurije hamwe abayobozi mu nzego z’ibanze, abafatanyabikorwa basaga 800.

Isuku ni ishingiro ry’ubuzima bwiza, iterambere rirambye, n’isura nziza y’igihugu. 

Ni muri urwo rwego Akarere ka Bugesera kiyemeje guteza imbere ubufatanye hagati y’inzego zitandukanye zirimo utugari, imidugudu, amatsinda y’abaturage, abajyanama b’ubuzima, hamwe n’indi miryango ifatanya n’ubuyobozi mu guteza imbere isuku.

Umuyobozi Wungirije wa Smart Kigali, Mberabahizi Raymond, yagarutse ku gushishikariza abayobozi n'inzego z'ibanze mu gufatanya kwimakaza isuku n'isukura mu bice bigize

Yagize ati: “Isuku ntishoboka tudafatanyije. Ubuyobozi, abaturage n’abafatanyabikorwa bose tugomba kugira uruhare rugaragara mu bikorwa birimo gutunganya ahaturiye, kwimakaza ubwiherero bunoze, gukaraba intoki, gutunganya imyanda no kurwanya ibihombo byiterwa n’umwanda.”

Ndikumana Boniface uyobora Umudugudu wa Mubuga, Akagari ka Nyabagendwa mu Murenge wa Rilima, agaragaza ko abatuye umudugudu bakwiye kurangwa n’ubufatanye mu bikorwa bigamije kwimakaza gahunda y’isuku n’isukura aho batuye.

Ati: “Impinduka z’iterambere ry’Akarere n’Igihugu muri rusange rigomba gushingira ku mudugudu kuko ariho hakorerwa ibikorwa byose birebana n’abaturage kandi ko abawutuye ari twe mbere na mbere tugomba kwishakamo uwo mutekano ndetse tukanagira umuco w’Isuku.”

Ubuyobozi bwasabye by’umwiharika abakozi b’Akarere, abayobozi b’imirenge n’utugari, abayobozi b’imidugudu, n’abafatanyabikorwa mu iterambere gukomeza kuba abafatanyabikorwa b’ingenzi mu gutoza abaturage no kubashyigikira mu bikorwa byose bigamije kwimakaza isuku.

Guverineri w’Intara y’iburasirazuba, Pudence Rubingisa, yibukije abayobozi b’inzego z’ibanze gushyira imbaraga mu kunoza isuku n'isukura.

Mu Rwego rwo kwimakaza umuco w’isuku n’isukura, ku vufatanye na Smart Kigali, mu Karere ka Bugesera hashyizweho itsinda rishinzwe gukurikirana ibikorwa by’isuku n’isukura hirya no hino rizwi nka Smart Bugesera.

Hakorwa kandi ubukangurambaga buhoraho, ndetse hanashyizweho gahunda y’igitondo cy’isuku mu mirenge yose kiba buri wa Gatanu w’icyumweru ku nsanganyamatsiko igira iti: “Isuku Hose Ihera kuri Njye.”