Kuri uyu wa Kabiri, tariki ya 10 Kamena 2025, Umuyobozi w’Akarere ka Bugesera, Mutabazi Richard, yitabiriye Inteko y’Abaturage yabereye mu Murenge wa Mayange, by’umwihariko mu Kagari ka Mbyo, aho yifatanyije n’abaturage mu biganiro bigamije kwimakaza umutekano n’imibereho myiza y’abaturage.

Muri iyi Nteko y’Abaturage, abaturage baganiriye n’ubuyobozi ku ngingo zitandukanye zirebana n’ubuzima bwabo bwa buri munsi, zirimo gukumira urugomo, kwirinda ibyaha, no kororera mu biraro mu rwego rwo guteza imbere ubworozi butanga umusaruro.

Umuyobozi w’Akarere ka Bugesera, Mutabazi Richard, yashimangiye akamaro ko kororera mu biraro nk’imwe mu nzira z’iterambere ry’ubworozi bw’umwuga, kuko bigira uruhare mu kurinda ubwatsi bw’amatungo, kwirinda amakimbirane hagati y’abaturage, ndetse no kongera umusaruro w’ubworozi. 

Yagize ati: “Kororera mu biraro ni kimwe mu bikorwa bizatuma mugira umusaruro mwiza, murinde imibanire mibi n'abaturanyi ndetse birinde ko amatungo yangiza imyaka y'abandi.”

Yibukije abaturage ko kuragira ku gasozi bishobora guteza umutekano muke, bityo abasaba kwirinda icyo gikorwa no gukomeza kwicungira umutekano mu midugudu yabo.

Na none, Umugenzacyaha Mukuru w’Urwego rw’Igihugu rw’Ubugenzacyaha (RIB) mu Karere ka Bugesera, Gakwaya Eulade, yibukije abaturage uruhare rwabo mu kurwanya ibyaha, abasaba kugira amakenga, kwirinda urugomo, no gutanga amakuru ku gihe ku bikorwa bikekwa ko bishobora guhungabanya umutekano. 

Yagize ati: "Umutekano wubakwa na buri wese. Iyo dutanze amakuru ku gihe kandi dufatanyije n’inzego z’umutekano, twirinda ko ibyaha bikorwa, tugashimangira ituze n’iterambere."

Abaturage bitabiriye Inteko bagaragarije ubuyobozi ko bishimiye umwanya bahawe wo gutanga ibitekerezo byubaka, banabasezeranya gufatanya mu gukumira ibyaha, guteza imbere isuku n’ubwisungane mu kwivuza (Mutuelle de Santé), no kugira uruhare rugaragara mu igenamigambi ry’akarere.

Inteko z’Abaturage zifatwa nk’umuyoboro w’imiyoborere myiza, aho abayobozi begera abaturage bakumva ibitekerezo byabo, bakanabagezaho ingamba na gahunda za Leta zishingiye ku iterambere rirambye.

Umuyobozi w'Akarere ka Bugesera Mutabazi Richard, yifatanije n'abaturage b'Akagari ka Mbyo, mu nteko y'Abaturage.

Umugenzacyaha Mukuru wa RIB mu Karere ka Bugesera, Gakwaya Eulade aganira n'abaturage b'Akagari ka Mbyo, Umurenge wa Mayange