Mu Karere ka Bugesera habereye inama yateguwe ku bufatanye n’Umuryango Uharanira Agaciro n’Iterambere by’Umunyafurika (Pan-African Movement – PAM), igamije gusobanurira abayobozi b’ibigo by’amashuri amavu n’amavuko y’uyu muryango n’intego zawo.

Iyi nama yabaye kuri uyu wa Kabiri tariki ya 11 Ugushyingo 2025, yayobowe na Visi Meya w’Akarere ka Bugesera Ushinzwe Iterambere ry’Ubukungu, Umwali Angelique, akaba ari na Chairperson w’Umuryango Uharanira Agaciro n’Iterambere by’Umunyafurika mu Karere ka Bugesera. Yari kumwe na Bagabe Nshayija Steven, Imboni y’Intara y’Iburasirazuba muri PAM ku rwego rw’Igihugu.

Umuyobozi w’Akarere wungirije ushinzwe iterambere ry’ubukungu, Umwali Angelique yasabye abayobozi b’ibigo by’amashuri guharanira agaciro n’iterambere ry’Igihugu, no kuzamura imibereho myiza y’umunyafurika bahereye mu bigo bayoboye. Yibukije ko kwigira no kwihesha agaciro ari inshingano z’ibanze z’umuyobozi wese, bityo bikaba ngombwa ko bigaragarira mu bikorwa by’amashuri.

Ku ruhande rwe, Bagabe Nshayija Steven yagarutse ku mavu n’amavuko y’Umuryango PAM, agaragaza ko intego zawo ari ugutoza urubyiruko gukunda Igihugu n’Umugabane wa Afurika, no kugira uruhare mu kwigira kw’Afurika. Yashimangiye ko amashuri ari urufunguzo mu kubaka ubumuntu n’ubutwari bw’abanyafurika b’ejo hazaza.

Abayobozi b’ibigo by’amashuri bitabiriye inama biyemeje ko mu gihe cy’icyumweru bazaba bamaze gushyiraho inzego z’ubuyobozi z’abanyeshuri z’Umuryango Uharanira Agaciro n’Iterambere by’Umunyafurika mu bigo bayoboye, kugira ngo abana bato batangire gutozwa indangagaciro z’ubumwe, kwigira no gukunda Afurika.

Panafrican Movement (PAM) Rwanda yashinzwe tariki ya  08 Kanama 2015 mu rwego rwo gushyigikira intego, amahitamo n’ikerekezo abanyarwanda bayobowemo na Perezida Paul KAGAME.