Kuri uyu wa kane tariki 24 Nyakanga 2025, mu karere ka Bugesera habereye amahugurwa agamije kongerera ubumenyi abayobozi b’ibigo by’amashuri n’abashinzwe uburezi ku rwego rw’imirenge, ku bijyanye n’ubuzima bw’imitekerereze y’abana n’uburyo bafasha abanyeshuri bafite ibibazo bifitanye isano nabwo.

Aya mahugurwa yateguwe n’umuryango Save the Children binyuze mu mushinga Zero Out of School Children, ugamije kugarura no gufasha abana bataye ishuri gusubira mu burezi bubafasha kugera ku nzozi zabo.

Umuyobozi w’Akarere ka Bugesera Wungirije Ushinzwe Imibereho Myiza y’Abaturage, Madamu Yvette Imanishimwe, yashimye ubufatanye bw’uyu muryango mu guteza imbere uburezi bunoze no kurengera uburenganzira bw’abana. 

Yasabye abitabiriye amahugurwa kuzagira uruhare mu gusangiza ubumenyi bahawe abandi barimu, kugira ngo inyigisho zijyanye n’ubuzima bw’imitekerereze y’abana zigerweho na bose.

Yagize ati: "Aya mahugurwa aje mu gihe nyacyo. Turifuza ko buri murezi agira ubumenyi buhagije mu gufasha abana bafite ibibazo by’imitekerereze, kuko bigira ingaruka ku myigire n’imyitwarire yabo."

Abitabiriye amahugurwa basobanuriwe uburyo bwo gutahura ibibazo by’imitekerereze abana bashobora guhura nabyo, ndetse n’ingamba zo kubafasha ku bufatanye n’inzego zitandukanye zirimo ababyeyi, ubuyobozi bw’amashuri n’abajyanama b’ubuzima.

Aya mahugurwa yitezweho kugira uruhare runini mu gukemura bimwe mu bibazo bituma abana bata ishuri, ndetse no gufasha abarerwa kugira ubuzima bwiza bwo mu mutwe bubafasha kwiga neza no kugera ku ntego zabo.