Nyuma yo gukurikirana ibikorwa bikorerwa abaturage ari nako bagira inama abayobozi n’abaturage ku cyakorwa kugirango hagire igihinduka mu mibereho y’abanyarwanda, intumwa za Rubanda ziyobowe na Honorable Nyirahirwa veneranda kuri uyu wa mbere taliki ya 16/1/2017 basuye ibikorwa byakozwe ku bufatanye bw’Akarere n’abaturage mu Murenge wa Rweru baganiriye n’abaturage babagaragariza ibyishimo batewe n’iterambere bagezeho. Abaturage bo mu mudugudu wa Mugina mu kagari ka Kintambwe mu murenge wa Rweru bubakiwe amavomero akoresha imirasire y’izuba. Ayo mazi azamurwa n’imashini, yubakiwe ahari hasanzwe hari pompe 2 z’amazi yasaranganywaga akagari ka batima , Kintambwe hiyongeyeho igice gito cya Nemba nk’uko twabibwiwe na Nyandwi Emmanuel umukozi ushinzwe inyubako mu Murenge wa Rweru. Ayo mazi azajya akusanyirizwa mu bigega by’amazi 2 ajya mu mavomo 6. Ayo mazi azagera mu bigega hakoreshejwe imirasire y’izuba bagejeje amazi ku ngo zirenze 1600 zizakoresha pano 60 z’ikoresha imirasire y’izuba. Abaturage ba Kintambwe bemeza ko, ayo mazi bagejejweho n’Akarere ka Bugesera byiyongera ku zindi gahunda zahinduye ubuzima bwabo binyuze ku bajyanama b’ububuzima. Abo bajyanama b’ubuzima babafasha kurya inryo yuzuye no kwegerezwa ubuvuzi bw’ibanze aho abana bari munsi y’imyaka 5 n’abagore batwite bitabwaho by’umwihariko ndetse bakanavura abaturage bose marariya. Abaturage bo mu murenge wa Rweru bo bafite n’umwihariko wo kuba barubakiwe umudugudu w’icyitegererezo mu gihugu watujwemo abantu bari baturiye amanegeka mu birwa bya Mazane na Sharita. Abo baturage ubu batujwe mu mudugudu wa Mbuganzeri mu Kagari ka Batima bagaragarije intumwa za Rubanda ibyishimo bidasanzwe; barishimira ko babonye inka mbere aho bari batuye batari bazi ibyo ubworozi. Bati : Twari abarobyi , none ubu turorora ndetse tugahinga.’’ Abo baturage bakomeza bavuga ko ubu bejeje ibishishimbo. Ibyo bikorwa byose bikorerwa abaturage ni imihigo Akarere kaba kashize mu bikorwa gateganyiriza abaturage mu rwego rwo guhindura ubuzima bw’abaturage bagana heza. Mukantare Jacqueline