Mu rwego rwo kurushaho guteza imbere iterambere rirambye n’imikoreshereze myiza y’ubutaka, ubuyobozi bw’Akarere ka Bugesera burakangurira abaturage bose kubahiriza igishushanyo mbonera cy’imikoreshereze y’ubutaka, nk’uko biteganywa n’amategeko n’amabwiriza agenga imikoreshereze y’ubutaka mu Rwanda. 

Ibi ni ibyagarutswe n’umuyobozi w’Akarere wungirije ushinzwe Iterambere ry’Ubukungu, Umwali Angelique mu Kiganiro bugesera mu Iterambere cyatumbutse kuri Television Izuba kuri uyu wa Gatatu, tariki ya 30 Nyakanga 2025 cyagarugaka ku “imikoreshereze y’igishushanyo mbonera cy’ubutaka n’imyubakire inoze.” 

Umuyobozi w’Akarere wungirije ushinzwe Iterambere ry’Ubukungu, Umwali Angelique, yavuze ko akarere ka Bugesera ari akarere kashyizwe mu cyiciro cy’Imijyi igaragiye Umurwa Mukuru w’Igihugu kubera amahirwe menshi ahari n’imishinga migari yo ku rwego rw’igihugu ihabarizwa nk’Ikibuga Mpuzamahanga cy’Indege, Icyanya cy’Inganda, ibiyaga byinshi byakorohereza ubukerarugendo n’ubuhinzi bukorewe ku buso bunini amashuri meza n’ibindi, bityo ko basaba abaturage gukoresha ubutaka mu buryo buboneye, bubahiriza igishushanyo mbonera cy’imikoreshereze y’ubutaka.

Yagize ati: “Ni ngombwa ko buri muturage amenya icyo ubutaka bwe bwagenewe, kandi agasaba ibyangombwa mbere yo kubaka. Ibi bizadufasha kugira imiturire itekanye, twirinda akajagari mu mikoreshereze y’ubutaka.”

Yongeyeho ko kubahiriza ibyo umuntu yemerewe gukora ku butaka bifasha Akarere mu igenamigambi rirambye no kwirinda amakimbirane ashingiye ku butaka.

Umuyobozi w’Ishami ry’Ubutaka n’Imiturire mu Karere, Ntukanyagwe Eric, yibukije abaturage ko serivisi zose zijyanye n’imiturire zirimo gusaba ibyangombwa byo kubaka, kwandikisha ubutaka, no kugenzura ibikorwa byo kubaka zibegereye kandi zitangwa ku gihe. Yagize ati:

“Twiyemeje kunoza imitangire ya serivisi no kurushaho kwegera abaturage. Ariko nanone turasaba ko buri wese afata inshingano zo gukoresha ubutaka neza, agasaba uruhushya mbere yo kubaka kugira ngo twirinde gusenya ibikorwa bidakurikije amategeko.”

Ubuyobozi bw’Akarere burasaba buri wese gukorana n’inzego zibishinzwe mbere yo gutangira ibikorwa bbijyanye n’imikoreshereze y’ubutaka hagamijwe kwirinda ibihombo byaterwa no kutagira ibyangombwa birimo gusabwa gukuraho ibyo bikorwa ndetse no gucibwa amande.

Akarere ka Bugesera ni akarere gafite ubuso 1337 km², gatuwe n'abaturage 551,103 (hashingiwe ku ibarura rusange ry'abaturage rya 2022). Ni akarere kagizwe n’Imirenge 15, Utugari 72 n’Imidugudu 581.