Ku gicamunsi cyo kuri uyu wa Kabiri, mu Mirenge itandukanye y’Akarere ka Bugesera, abaturage bitabiriye inteko z’abaturage baganira n’ubuyobozi ku ngingo zitandukanye ziganjemo umutekano, imyubakire, ubuhinzi n’isuku.

Umuyobozi w’Akarere ka Bugesera, Mutabazi Richard, yitabiriye inteko y’abaturage yabereye mu Murenge wa Mareba, aho yaganiriye n’abaturage b’Akagari ka Rango ku ngingo zirimo kwita ku mutekano no kwirinda imyubakire y’akajagari hagamijwe kurengera ubutaka no kubukoresha icyo bwagenewe.

Na ho Umuyobozi w’Akarere Wungirije Ushinzwe Iterambere ry'Ubukungu, Umwali Angelique, yifatanyije n’abaturage b’Umurenge wa Ngeruka, Akagari ka Murama. Yaganiriye nabo kuri gahunda za Leta zirimo ubuhinzi n’ubworozi, isuku n’isukura, gahunda y’intore mu biruhuko n’izindi.

Mu butumwa yatanze, Umwali Angelique yasabye abaturage gutangira kwitegura igihembwe cy’ihinga 2025–2026A, gushyira imbaraga mu kujyana abana muri gahunda y’intore mu biruhuko, ndetse no kwimakaza umuco w’isuku, isukura no kwicungira umutekano mu ngo zabo no mu midugudu.

Inteko z’abaturage ziba buri wa Kabiri wa buri cyumweru, ni gahunda ya Leta igamije gukomeza kwegera abaturage no kubashishikariza kugira uruhare mu bikorwa bibateza imbere n’igihugu muri rusange.