Abanyamuryango ba Unity Club Intwararumuri basuye Urwibutso rwa Jenoside yakorewe Abatutsi rwa Nyamata, ruruhukiyemo imibiri y'Abatutsi basaga ibihumbi 45 kwibuka ku nshuro ya 31 Jenoside yakorewe Abatutsi.

Iki gikorwa cyitabiriwe n’Umuyobozi wungirije wa mbere wa Unity Club Intwararumuri, Hon. Kayisire Marie Solange, Umuyobozi w’Akarere Wungirije Ushinzwe Imibereho Myiza y’Abaturage, Imanishimwe Yvette.

Ni igikorwa cyabanjirijwe no gusura ibice bigize Urwibutso rwa Jenoside yakorewe Abatutsi rwa Nyamata ruri mu Murenge wa Nyamata ndetse ari nako umukozi wa MINUBUMWE abasobanurira ibice birugize n’amateka yaranze Jenoside yakorewe Abatutsi mu karere ka Bugesera by’umwihiriko mu bice bituranye n’uru rwibutso.

Murorunkwere Julienne, warokokeye Jenoside yakorewe Abatutsi mu Murenge wa Nyamata, mu buhamya yatanze, yagarutse ku bukana Jenoside yanamutwaye umuryango we wose yakoranywe, ashimira Inkotanyi zayihagaritse, agaragaza ko afitanye igihango nazo mu kubaka u Rwanda ruzira amacakubiri

Yagize ati: “Nubwo umuryango wanjye umuryango wanjye wose wasigaye muri uwo mugenda wose [Umuryango we wishwe], ndiho. Kubera Igihugu ndiho kubera mwebwe mwese mufata umwanya mukadutega amatwi, muri urwo rugendo tutazi kumenya aho dutangirira n'aho dusoreza. Ndagira ngo mbashimire kandi nanjye umusanzu w'ubuzima nzakomeza kuwutanga kugira ngo ubuzima bw'umunyarwanda kugira ngo nawe akomeze kubaho.”

Umuyobozi w'Akarere Wungirije Ushinzwe Imibereho Myiza y'Abaturage, Imanishimwe Yvette, yashimiye abanyamuryango ba Unity Club Intwararumuri kuba barahisemo gukorera igikorwa cyo kwibuka ku nshuro ya 31 Jenoside yakorewe Abatutsi mu Karere ka Bugesera.

Ati: ” Mbanje kubakomeza kandi mbashimira nk’abagize Unity Club Intwararumuri ko mwateguye iki gikorwa cyo Kwibuka ku nshuro ya 31 Jenoside yakorewe Abatutsi, mukanahitamo kugikorera mu Karere ka Bugesera hano ku rwibutso rwa Jenoside yakorewe abatutsi rwa Nyamata.

Umuyobozi Mukuru Wungirije wa mbere wa Unity Club Intwararumuri, Hon. Kayisire Marie Solange, yashimiye ubutwari bw’ingabo zari iza RPA zahagaritse Jenoside, ziyobowe na Perezida wa Repubulika y’u Rwanda, Nyakubahwa Paul Kagame, ubu u Rwanda rukaba ruzira amacakubiri, inzangano n’ironda karere.

Hon. Kayisire Marie Solange yibukije kandi ko nk’Intwararumuri bafite inshingano yo kurwanira ukuri no guharanira kubaho bimakaza indangagaciro z’abanyarwanda.

Yagize ati: “Tuzakomeza kurwanya twivuye inyuma abashaka kugoreka amateka yacu bakwirakwiza ibinyoma, bahakana, bakanapfobya Jenoside yakorewe Abatutsi. Tuzakomeza gushyira hamwe duharanira ko ukuri guhabwa intebe mu Rwanda no mu mahanga.

Uru rwibutso rwa Nyamata rufite umwihariko wo kugaragaza uruhare rw’ubutegetsi bubi mu mateka mabi y’itotezwa n’ubwicanyi byakorewe Abatutsi, bikanagera ku ndunduro ya Jenoside yakorewe Abatutsi mu 1994. Urwibutso rwa Jenoside rwa Nyamata ni ahahoze ari kiliziya, aho abarenga 10,000 biciwe mu kiriziya bahahungiye. Ubu haruhukiye imibiri isaga ibihumbi 45, biciwe hirya no hino muri Bugesera. Hari ndetse n’imyambaro yabo n’ibindi bikoresho nk’ikimenyetso cy’amateka ya Jenoside yakorewe Abatutsi atazibagirana.