Abakunzi b’ikipe ya Arsenal muri Afurika, bitabiriye iserukiramuco mu Rwanda basuye Urwibutso rwa Jenoside rwa Ntarama basobanurirwa amateka ya Jenoside yakorewe Abatutsi, banafungura televiziyo [Aheza Media TV] izajya inyuzwaho ibiganiro byo kurwanya ihungabana.

Ni igikorwa kitabiriwe n’abakunzi ba Arsenal baturuka mu bihugu bitandukanye muri Afurika cyabereye mu Murenge wa Ntarama kuri uyu wa 19 Mata 2025 kibanzirizwa no gutera ibiti muri gahunda yo kurwanya no guhangana n’imihindagurikire y’ikirere.

Bari kumwe n’Umuyobozi  w’Akarere Wungirije Ushinzwe Imibereho Myiza y’Abaturage, Yvette Imanishimwe, wifatanije n’abakunzi b’iyi kipe isanzwe ifitanye amasezerano n’u Rwanda mu kumenyakanisha ibikorwa by’ubukerarugendo bw’U Rwanda binyuze muri gahunda ya Visit Rwanda basuye urwibutso rwa Jenoside rwa Ntarama bashyira indabo kuri uru rwibutso ndetse bunamira imibiri y’Abatutsi isaga ibihumbi 5 iruruhukiyemo, bishwe muri Jenoside yakorewe Abatutsi ndetse basobanurirwa amateka yaranze Jenoside Yakorewe Abatutsi.

Nyuma y’ibi bikorwa aba bafana bakomereje igikorwa cyabo mu kigo cy’Isanamitima n’Ubudaheranwa Aheza Healing Center giherereye mu Murenge wa Ntarama, bafungura televiziyo ya shene ya YouTube yiswe ‘Aheza Media TV’, izajya inyuzwaho ibiganiro by’isanamitima no kurwanya ihungabana iryo ari ryo ryose mu Banyarwanda.

Umuyobozi w'Akarere ka Bugesera wungirije ushinzwe Imibereho Myiza y'Abaturage, Imanishimwe Yvette, yashimye abafana ba Arsena bagejeje ibikorwa byabo mu Karere ka Bugesera.

Yagize ati:” Turabashimira ku bikorwa byiza mwakoreye hano mu karere kacu, birimo gusura urwibutso rwa Ntarama rwa Jenoside yakorewe Abatatsi, gutera ibiti mu rwego rwo kubungabunga ibidukikije no guhangana n’imihindagurikire y’ikirere. Iki cyumba cy’isanamitima kandi muduhaye kizadufasha mu bikorwa byo guhangana n’ingaruka za Jenoside yakorewe abatutsi, gufata ubuhamya ndetse no kurwanya ihungabana iryo ari ryo ryose” 

Perezida wa w’Abakunzi ba Arsenal mu Rwanda, Bigango Valentin, yashimiye aba bafana abizeza ko nibongera kugera mu Rwanda bazasanga imibare y’abahungabana yaragabanyutse.

Ati “Iki gikorwa dutangije uyu munsi ni icyerekana iterambere ry’aba-sportifs mu Rwanda. Nubwo hashize imyaka 31 habaye Jenoside yakorewe Abatutsi, ntibibuza ko hari abagifite ihungabana. Kubegera bose icyarimwe biragoye, akaba ari yo mpamvu dukeneye kwifashisha ikoranabuhanga. Turabaha icyizere ko ubwo muzagaruka mu Rwanda muzasanga hari uruhare iyi televiziyo yagize mu gutuma abantu bakira indwara zo mu mutwe.”

Mu murenge wa Ntarama abakunzi ba Arsenal bavuye mu bihugu bitandukanye bya Afurika bari mu iserukiramuco mu Rwanda batashye icyumba cy'isanamitima [Aheza Media TV] gifite agaciro ka Miliyoni 15 Frw ndetse nabatera ibiti bisaga 400 birimo iby’imbuto n’ibivangwa n’imyaka.

Abakunzi ba Arsenal muri Africa basuye urwibutso rwa Jenoside rwa Ntarama rushyinguyemo imibiri isaga ibihumbi 5 y'Abatutsi bishwe muri Jenoside yakorewe Abatutsi

Banafungura televiziyo Aheza Media TV izajya inyuzwaho ibiganiro byo kurwanya ihungabana.

Umuyobozi w'Akarere ka Bugesera wungirije ushinzwe Imibereho Myiza y'Abaturage, Imanishimwe Yvette, yifatanyije n'abafana ba Arsenal batera ibiti bisaga 400 mu Murenge wa Ntarama.

Umuyobozi w'Akarere ka Bugesera wungirije ushinzwe Imibereho Myiza y'Abaturage, Imanishimwe Yvette, yashimye abafana ba Arsenal ku bikorwa bakoreye mu Karere ka Bugesera abizeza kuzabifata neza

Perezida wa w’Abakunzi ba Arsenal mu Rwanda, Bigango Valentin, yavuze ko biteza umusaruro mwiza ku bikorwa bakoreye mu Karere ka Bugesera

Abakunzi ba Arsenal bavuye mu bihugu bitandukanye bya Afurika bari mu iserukiramuco mu Rwanda batashye icyumba cy'isanamitima [Aheza Media TV] gifite agaciro ka miliyoni 15 Frw.

AMAFOTO: IGIHE.COM