Abakozi b’Akarere ka Bugesera barenga 600 kuva ku rwego rw’Akagari kugera ku rwego rw’Akarere bitabiriye Inama Rusange y’Abakozi b’Akarere ifite insanganyamatsiko igira iti: “Uruhare Rwanjye mu Iterambere ry’akarere k’Ubudasa”, bibutswa ko kunoza imikorere n’imikoranire no guha serivisi zinoze abaturage ari wo musingi w’Iterambere rirambye.

Ni inama yabaye kuri ki cyumweru Tariki 26 Ukwakira 2025 yitabirwa n’umunyamabanga nshingwabikorwa w’Intara y’Iburasirazuba, Nyirahabimana Jeanne, Ubuyobozi bw’Akarere n’abandi batumirwa. 

Mu gutangiza iyi nama, Umuyobozi w’Akarere ka Bugesera, Mutabazi Richard, yashimangiye ko intego nyamukuru y’iyi nama ari uguhuza gahunda n’amakuru kugira ngo umusaruro witezwe ku bakozi uboneke. 

Yagize ati: “Ni inama iza kuduha amakuru y’ingenzi mu bikorwa bikenewe, imihigo, n’imishinga minini ku cyerekezo cy’Akarere.”

Umunyamabanga Nshingwabikorwa w’Akarere, Nkuranga Joseph Kayonga, yatanze ikiganiro cyibanze ku micungire y’abakozi, agaruka ku mahame mbonezamurimo n’imyitwarire ikwiye kuranga abakozi ba Leta. Yagaragaje ishusho rusange y’umubare w’abakozi bari mu kazi, anagaragaza uko imikorere inoze ishobora gutanga umusaruro ugaragara.

Mu kiganiro cyihariye, Umuyobozi w’Akarere, Mutabazi Richard, yagarutse ku ngingo z’ingenzi zafasha abakozi kunoza inshingano zabo zirimo; kwiha intego zifatika, gukoresha neza igihe, kumenya ibikorwa by’ingenzi bikwiye kwitabwaho n’ibindi.

Umuyobozi wa Polisi mu Ntara y’iburasirazuba, ACP Innocent Kanyamihigo, yagaragaje ishusho y'uko umutekano ku byaha bitandukanye uhagaze mu Mirenge igize Akarere ka Bugesera, asaba abitabiriye iyi nama ubufatanye mu guhuza amakuru n'ubukangurambaga mu kubikumira.

Umunyamabanga Nshingwabikorwa w’Intara y’Iburasirazuba, Dr. Nyirahabimana Jeanne, yasabye abakozi gufata ingamba nshya zigamije guteza imbere imibereho myiza y’abaturage. Yagaragaje ko ibyo abakozi bungukira mu nama nk’izi bigomba kubafasha kunoza imikorere n’imikoranire, bityo bagatanga serivisi zinoze ku baturage.

Iyi nama yitabiriwe n’abakozi b’Akarere kuva ku rwego rw’akagari kugera ku rw’Akarere basaga 600, barimo Abakozi bose b’Utugari, Imirenge, inzego z’umutekano (DASSO), Ibitaro, Ibigo nderabuzima n’Ibigo by’Amashuri ya leta bikorera mu karere ka Bugesera. Yabaye umwanya wo gusangira amakuru, kongera ubumenyi, no gutegura ibikorwa bifatika bigamije iterambere ry’Akarere k’Ubudasa.