Abakozi b'Urwego rushinzwe ubugenenzacyaha (RIB), Polisi, DASSO n'urubyiruko rw'abakorerabushake ruturutse mu Mirenge igize Akarere ka Bugesera, basoje amahugurwa y’iminsi ibiri agamije kubongerera ubumenyi ku ihohotera rishingiye ku gitsina n'uburyo bwo kurirwanya hubakwa umuryango ushoboye kandi utekanye.

Ni amahugurwa yateguwe na Minisiteri y’Uburinganire n’Iterambere ry’Umuryango, ku bufatanye na Minisiteri y'Ubutegetsi bw'Igihugu, yatangiye tariki ya 05 Gicurasi kugera ku ya 06 Gicurasi 2025.

Abitabiriye aya mahugurwa y’iminsi ibiri (2) bagize umwanya wo gusobanurirwa birambuye ibiranga ihohotera rishingiye ku gitsina, ibihano bihabwa uwahohoteye umwana, uburyo bwo kurikumira no gusubiza mu buzima busanzwe uwahohotewe.

Umujyanama mu bya Tekinike muri Minisiteri y’Uburinganire n’Iterambere ry’Umuryango, mu ishami rishinzwe kuzamura imibereho myiza y’Umiryango, NDEJEJE Francois Xavier yavuze ko Minisiteri y’Uburinganire n’Iterambere ry’Umuryango bateguye aya mahugurwa hagamijwe kongerera ubumenyi abagenzacyaha, abapolisi ndetse n’urubyiruko rw’abakorerabushake mu rwego rwo kuwanya, gukumira ihohoterwa rishingiye ku gitsina ndetse no gufasha abahohotewe bigamije kubaka umuryango.

Ati: ”Nka MIGEPROF n’abafatanyabikorwa twateguye aya mahugurwa mu rwego rwo kongerera ubumenyi n’ubushobozi abakozi ba RIB, Polisi, DASSO ndetse n’urubyiruko rw’abakorerabushake mu mirenge itandukanye kugira ngo tubahe amakuru y’ingenzi azabafasha aba bayobozi kurushaho gusobanukirwa uruhare rwabo mu kurushaho kwimakaza iri hame ry’uburinganire mu kazi kabo, kurwanya ihohoterwa rishingiye ku gitsina no gufasha abahuye naryo kugera kuri serivisi n’ubutabera buboneye.”

Umuyobozi w'Akarere ka Bugesera, Mutabazi Richard, yasabye abayitabiriye kwiyemeza gushyira mu bikorwa ibyo bigiyemo no gutanga umusaruro mu kurwanya, gukumira ihohotera rishingiye ku gitsina no gufasha uwahohotewe hagamijwe kurengera uburenganzira bw'umwana no kubaka umuryango uzira amakimbirane.

Yagize ati:” Ibyo dukuyemo muri aya mahugurwa, twiyemeze ko tugiye kubishyira mu bikorwa kandi bigatanga umusaruro mu gufasha, kurwanya, gukumira ihohotera rishingiye ku gutsinda ndetse no gufasha abahuye naryo ndetse no gukemura ibindi bibazo bishingiye ku makimbirane yo mu miryango tugamije kurengera uburenganzira bw'abana.”

Abitabiriye aya mahugurwa barushijeho gusobanurirwa uruhare rw'abayobozi mu nzego zegereye abaturage mu gukumira no kurwanya ihohotera rishingiye ku gitsina n'inda ziterwa abangavu, ihohotera rikorerwa abana ndetse n’uburyo bwo gufasha uwahohotewe no kumusubiza mu buzima busanzwe.

Ihohoterwa rishingiye ku gitsina ni icyaha gihanwa bikomeye n’amategeko y’u Rwanda. By’umwihariko uwasambanyije umwana ashobora guhanishwa igifungo cya burundu nkuko bivugwa mu itegeko Nº68/2018 ryo kuwa 30/08/2018 riteganya ibyaha n’ibihano muri rusange, by’umwihariko mu bihano biteganywa n’ingingo ya 133 harimo igihano cy’ igifungo cya burundu.