Kuri uyu wa mbere, tariki ya 28 Mata 2025, mu cyumba cy’inama cy’Akarere ka Bugesera habereye inama yahurije hamwe abakora ubucukuzi bw’amabuye mu Karere ka Bugesera, igamije kurebera hamwe uburyo bwo kunoza imikorere y’ubucukuzi bw’amabuye hibandwa mu kwirinda impanuka ziterwa n’ubucukuzi.

Ni inama yayobowe n’Umuyobozi w’Akarere wungirije ushinzwe iterambere ry’ubukungu, Umwali Angelique, yitabirwa n’abayobozi ba kampani zikora ubucukuzi bw’amabuye mu Karere ka Bugesera ndetse n’abakozi b’ikigo cy’igihugu gishinzwe ubucukuzi bw'Amabuye, Peteroli na gaze.

Umuyobozi w’Akarere wungirije ushinzwe iterambere ry’ubukungu, Umwali Angelique, yavuze ko iyi nama yari igamije kwibukiranya imikorere no gufata ingamba zigamije guteza imbere ubucukuzi bw’amabuye, kurengera ubuzima bw’abaturage n’ibidukikije.

Ati: ” Iyi nama yahurije hamwe abacukurura amabuye ya kariyeri mu Karere ka Bugesera mu rwego rwo kwibukiranya imikorere no gufata ingamba zigamije guteza imbere ubucukuzi bw’amabuye ndetse no kurengera ubuzima bw’abaturage no kurengera ibidukikije muri rusange. Muri iyi nama kandi, twafatiyemo imyanzuro irimo guhagarika ibirombe bishyira abantu mu kaga hagakomorerwa nyuma y’uko bamaze kuhatunganya.

Visi Meya Umwali yagaragaje kandi ko iyi nama yagaragaje kandi ko ubucukuzi bw’amabuye muri Bugesera buteza imbere abaturage bahabwamo akazi, ba rwiyemezamirimo ubwabo ndetse bigatanga n’imisore ku karere.

Abakora umwuga wo gucukura amabuye mu birombe bitandukanye, biyemeje kugira uruhare mu kurinda impanuka ziterwa n’ubucukuzi, bagatunganya imihanda igana ku birombe ndetse n’ubutaka buhanamye bushobora guteza impanuka.

Muri iyi nama hemejwe ko hagiye gushyirwaho komite z’abacukuzi ku rwego rwa buri murenge mu rwego rwo guhanahana no guhuza amakuru ku bikorwa by’ubucukuzi.

Mu Karere ka Bugesera, imirenge ya Nyamata, Ntarama, Musenyi, Juru, Gashora, Nyarugenge na Mwogo niyo ikorerwamo ubucukuzi bw’amabuye ya kariyeri akoreshwa mu bikorwa by’ubwubutsi hirya no hino.

Itegeko N° 072/2024 ryo ku wa 26/06/2024 rigenga ubucukuzi bw’amabuye y’agaciro na kariyeri, mu ngingo yaryo ya 62, ivuga ku kudakurikije ibipimo ngenderwaho byerekeye ubuzima n’umutekano no kurengera ibidukikije, igaragaza ko umuntu wahawe uruhushya utubahiriza ibipimo ngenderwaho byerekeye ubuzima, umutekano no kurengera ibidukikije mu bikorwa by’ubucukuzi bw’amabuye y’agaciro cyangwa ubwa kariyeri, aba akoze ikosa ahanishwa ihazabu yo mu rwego rw’ubutegetsi itari munsi ya 1.000.000 FRW ariko itarenze 3.000.000 FRW.

Iyo ikosa rivugwa mu gika cya (1) cy’iyi ngingo riteje iyangirika ry’ibidukikije, uwarikoze ahanishwa ihazabu yo mu rwego rw’ubutegetsi itari munsi ya 3.000.000 FRW ariko itarenze 5.000.000 FRW.

Umuyobozi w'Akarere wungirije ushinzwe iterambere ry'Ubukungu, Umwali Angelique, yasabye abakora umwuga w'ubucukuzi bw'amabuye kubahiriza amabwiriza yabwo.

Ni inama yitabiriwe n’abayobozi ba kampani zikora ubucukuzi bw’amabuye mu Karere ka Bugesera ndetse n’abakozi b’ikigo cy’igihugu gishinzwe Amabuye, petrole na gaze.

Mu Karere ka Bugesera imirenge ya Nyamata, Ntarama, Musenyi, Juru, Gashora, Nyarugenge na Mwogo niyo ikorerwamo ubucukuzi bw’amabuye ya kariyeri akoreshwa mu bikorwa by’ubwubutsi hirya no hino.