Umuyobozi w’Akarere Wungirije Ushinzwe Imibereho Myiza y’Abaturage, Imanishimwe Yvette, yakoranye inama n’abakozi bashinzwe isuku n’isukura mu Mirenge yose igize Akarere ka Bugesera, ndetse na ba rwiyemezamirimo bakora ibikorwa byo gutwara imyanda mu Mirenge hagamijwe kunoza isuku n’isukura.

Iyi nama igamije gufatanya mu kunoza ibikorwa by’isuku n’isukura, kongerera imbaraga n’ubufatanye hagati y’Akarere, inzego z’ibanze n’abikorera kugira ngo Bugesera isuku kandi ibereye abaturage bayo.

Mu butumwa bwe, Umuyobozi w’akarere wungirije Ushinzwe Imibereho myiza y’abaturage, Imanishimwe Yvette yashimangiye ko isuku n’isukura ari inkingi ikomeye y’ubuzima bwiza n’iterambere rirambye asaba buri wese kubigira ibye kugira ngo bigerweho. 

Yagize ati: “Isuku ni ishingiro ry’imibereho myiza. Nta terambere ryagerwaho abaturage batagira ahantu hasukuye. Turashishikariza buri wese kugira uruhare mu bikorwa by’isuku no gukorana neza n’abashinzwe gutwara imyanda kugira ngo Akarere kacu kagaragare neza.”

Muri iyi nama kandi haganiriwe ku mikorere y’abatwara imyanda, uburyo bwo gukemura ibibazo bijyanye no kwishyurwa, imitangire ya serivisi zinoze, ndetse n’ingamba zo gukomeza gukangurira abaturage kugira uruhare mu gukumira imyanda idacungwa neza.

Hanagarutswe kandi ku gukomeza ubukangurambaga ku isuku rusange, gucunga neza ahatangirwa serivisi z’ubucuruzi n’amashyirahamwe, ndetse no gukangurira buri rugo kugira uburyo bwo gutunganya no gutwara imyanda yo mu ngo.

Abitabiriye inama bemeranyije ko bagiye kurushaho gufatanya mu gushyira mu bikorwa imyanzuro y’inama hagamijwe kunoza isuku n’isukura.