Mu Karere ka Bugesera habereye inama mpuzabikorwa y'iminsi ibiri igamije kunguranibitekerezo ku mikorere y’Ingo mbonezamikurire y’abana bato, zishamikiye kuri VUP no kubahugura ku nyoborabarezi zikoreshwa n'abarezi bo muri izi ngo.

Ni inama yayobowe n'Umuyobozi w'Akarere wungirije Ushinzwe Imibereho Myiza y’Abaturage, Imanishimwe Yvette, ari kumwe n’umukozi wa Imbuto UWASE Noella, yitabirwa n'abafite aho bahuriye na gahunda yo kwita ku Ngo Mbonezamikurire y'abana bato zishingiye kuri VUP mu Karere ka Bugesera.

Afungura inama, Umuyobozi w’Akarere Wungirije Ushinzwe Imibereho Myiza Y’Abaturage, Imanishimwe Yvette, yashimiye umufatanyabikorwa w’Akarere, Imbuto Foundation, ku gikorwa bateguye kigamije guteza imbere ingo mbonezamikurire y’bana bato.

Umuyobozi w’Akarere Wungirije Ushinzwe Imibereho Myiza y’Abaturage, Imanishimwe Yvette, yagaragarije abitabiriye iyi nama ibikorwa byakozwe mu guteza imbere Ingo mbonezamikorere y’abana bato mu karere ka Bugesera birimo gutegura umunsi w’ingo mbonezamikurire Kabiri mu mwaka, kandi n'inzego zose bakaba barasobanuriwe serivisi zitangirwa mu ngo mbonezamikurire.

Visi Meya Imanishimwe kandi yavuze ko iyi nama: “Ari umwanya mwiza wo kugaragaza ibyakozwe, ibikeneye ubuvugizi ndetse no kwakira ibitekerezo bigamije kunoza gahunda y’Ingo mbonezamikurire y’abana bato.”

Yabasabaye kandi gukurikirana imikoreshereze y'inyoborabarezi bahuguweho kuko zizafasha abarezi mu ngo mbonezamikurire.

Umukozi wa Imbuto Foundation, UWASE Noella, yavuze ko nka imbuto Foundation bazakomeza kugira imikoranire n’Akarere ka Bugesera mu guteza imbere ingo mbonezamikurire y’abana abato hagamijwe kurwanya imirire mibi n’igwingira.

Iyi nama mpuzabikorwa ku ngo mbonezamikirire y’abana bato ihuza abakozi bakurikirana ingo mbonezamikurire zishingiye kuri gahunda ya VUP n'abagenzuzi b'uburezi mu Mirenge, Ishami ry'uburezi, ubuzima n'imibereho myiza.