Kuri uyu wa Gatatu, tariki ya 03 Nzeri 2025, ku bufatanye n’Ikigo cy’igihugu gishinzwe guteza imbere ubuhinzi n’ubworozi, mu cyumba cy'inama cy'Akarere, hateraniye inama itegura igihembwe cy'ihinga 2026A, yahuje Ubuyobozi bw'Akarere n'abafatanyabikorwa b'Akarere mu guteza imbere ubuhinzi n'ubworozi. 

Inama yayobowe n’Umuyobozi w’Akarere Wungirije Ushinzwe Iterambere ry’Ubukungu, Umwali Angélique, ari kumwe n’Umuyobozi Mukuru w’Agateganyo wa RAB, Uwituze Solange.

Umuyobozi w’Akarere wungirije ushinzwe iterambere ry’ubukungu, Umwali Angelique yasabye abitabiriye iyi nama kongera imbaraga mu gukangurira abaturage guhinga ubutaka bwose kugira ngo hongerwe ubuso bushya buzahingwaho imyaka muri iki gihembwe cy’ihinga cya 2026A.

Umuyobozi Mukuru w’Agateganyo wa RAB, Uwituze Solange, yasabye abashinzwe ubuhinzi n’ubworozi mu Karere ka Bugesera kuzamura umubare w’abafata ubwishingizi bw’ibihingwa n’amatungo no gushishikariza abahinzi kurwanya isuri mu gihe bari mu bikorwa by’ubuhinzi. 

Abitabiriye biyemeje gukora ubukangurambaga mu gushishikariza abaturage kwitegura igihembwe cy’ihinga, harimo kongera imbaraga mu gukoresha inyongeramusaruro ku gihe, guhuza ubutaka no kunoza uburyo bwo kugeza imbuto ku bahinzi, hagamijwe kongera umusaruro no guteza imbere imibereho myiza y’abaturage.

Iyi nama yitabiriwe n’abakozi bashinzwe ubuhinzi n’ubworozi mu Karere n’Imirenge, ndetse n’abacuruzi b’inyongeramusaruro n’imbuto ndetse n’abafatanyabikorwa mu guteza imbere ubuhinzi bakorera mu Karere ka Bugesera.