Ku gicamunsi cyo kuri uyu wa Kabiri, Itsinda ry’Abadepite mu Nteko Ishingamategeko y’U Rwanda, bitabiriye Inteko y’abaturage mu Murenge wa Nyamata, baganira n’abatuye Akagari ka Murama ndetse banakemura ibibazo bagejejeweho n’abaturage.

Bari kumwe n’umuyobozi w’akarere wungirije ushinzwe iterambere ry’Ubukungu, Umwali Angelique, itsinda ry’abadepite riyobowe na Hon. Nizeyimana Pie basuye umurenge wa Nyamata, baganiriza n’ubuyobozi ku mitangire ya Serivisi zitandukanye zirimo; iz’ubutaka, ikoranabuhanga n’izindi.

Ku gicamunsi iri tsinda ryakomereje ibikorwa byo gusura abaturage muri uyu murenge, bifatanya n’abaturage b’Akagari ka Murama mu nteko y’abaturage.

Depite Hon. Mukamana Alponsine yasabye abaturage bitabiriye Inteko kwitabira serivisi z’ikoranabuhanga mu rwego rwitabira gahunda ya Byikorere igamije gufasha abaturage kubona serivisi hafi kandi vuba. 

Umuyobozi w’Akarere wungirije ushinzwe iterambere ry’Ubukungu, Umwali Angelique, yashimiye Abadepite bafatanyije n’abaturage b’akarere ka Bugesera mu nteko z’abaturage.

Yasabye abaturage gukoresha neza igishushanyo mbonera cy'Akarere cy'imikoreshereze y'ubutaka, kwishyura Mitiweli ndetse no kwishakamo ibisubizo by'ibibazo bibangamiye imibereho.

Muri iyi nteko kandi, abaturage babwiye Abadepite ko bishimira aho igihugu kigeze mu bumwe n’ubudaherenwa bw’Abanyarwanda, babizeza ko bazakomeza guharanira ubumwe nk’amahitamo y’abanyarwanda.